Live Updates

مقبوضہ کشمیر میں مزید فورسزکی تعیناتی قابل مذمت ہے،چوہدری نعیم اختر

مودی نے ہندو امرناتھ یاترا کی آڑ میں 581کمپنیوں کی تعیناتی کی منظوری دی ہے

اتوار 1 جون 2025 14:30

پیرس(اُردو پوائنٹ اخبارتازہ ترین - این این آئی۔ 01 جون2025ء)چیئرمین جموں وکشمیر فورم فرانس چوہدری نعیم اختر نے نریندر مودی کی بھارتی حکومت کی جانب سے مقبوضہ جموں وکشمیر پر اپنا غیر قانونی تسلط مزید مضبوط کرنے کیلئے پیراملٹری فورسز کی مزید581 کمپنیوں کی تعیناتی کی منظوری کی شدید ترین مذمت کی ہے۔اپنے جاری کردہ خصوصی بیان میں چوہدری نعیم اختر نے کہا کہ بھارتی وزیراعظم نریندرمودی نے ہندو امرناتھ یاترا کی آڑ میں پیراملٹری فورسز کی مزید 581کمپنیوں کی تعیناتی کی منظوری دی ہے تاکہ مقبوضہ علاقے میں خوف اور دہشت کا ماحول قائم رہ سکے مقبوضہ علاقے میں پہلے ہی10لاکھ سے زائد قابض بھارتی فوجیوں کوتعینات کر رکھا ہے۔

انھوں نے مزید کہا کہ کشمیری عوام اقوام متحدہ کی طرف سے تسلیم شدہ اپنے حق خودارادیت کیلئے جدوجہد کر رہے ہیں بھارت بین الاقوامی دباؤ سے بچنے کے لیے ایک بار پھر دہشت گردی کے نام پر کشمیریوں کے خلاف ظلم کی نئی لہر چلا رہا ہے۔

(جاری ہے)

ان کا کہنا تھا کہ مقبوضہ جموں وکشمیر میں بھارت کی طرف سے جو کچھ کیا جا رہا ہے وہ انسانی حقوق کی پامالی کی بدترین مثال ہے وہاں تعینات فورسز کشمیریوں کے خلاف ظلم کا ہر حربہ اور ضابطہ روا رکھے ہوئے ہیں اقوام متحدہ کی قراردادیں موجود ہیں جن پر عمل کرتے ہوئے کشمیریوں کو حقِ استصواب دیا جائے حق خودارادیت کشمیریوں کا پیدائشی اور بنیادی حق ہے کشمیری اپنا حق لینے سے کسی صورت دستبردار نہیں ہونگے ان شاء اللہ بہت جلد تحریک آزادی کشمیر اپنے منطقی انجام کو پہنچے گی اور مقبوضہ جموں وکشمیر کی حیثیت بحال ہونے کے ساتھ ساتھ کشمیریوں کو اقوام متحدہ کی قراردادوں کے مطابق ان کا حق خودارادیت مل کر رہے گا۔