Live Updates

پنجاب اسمبلی کے حلقہ پی پی 52 سیالکوٹ IX میں ضمنی انتخاب کے لیے پولنگ شروع ہو گئی

اتوار 1 جون 2025 15:40

سیالکوٹ (اُردو پوائنٹ اخبارتازہ ترین - اے پی پی۔ 01 جون2025ء) پنجاب اسمبلی کے حلقہ پی پی 52 سیالکوٹ IX میں ضمنی انتخاب کے لیے پولنگ شروع ہو گئی ہے۔ صوبائی اسمبلی میں حلقے کے نمائندے کے انتخاب کے لیے پولنگ شام 5 بجے تک بغیر کسی وقفے کے جاری رہے گی۔ پاکستان مسلم لیگ نواز (پی ایم ایل این)کے رکن صوبائی اسمبلی (ایم پی اے)چوہدری ارشد جاوید وڑائچ کے انتقال کے بعد خالی ہونے والی اس نشست کے لیے چودہ امیدوار میدان میں ہیں۔

پاکستان مسلم لیگ (ن)سے (چوہدری ارشد جاوید وڑائچ مرحوم کی بیٹی)حنا ارشد ، پاکستان پیپلز پارٹی پارلیمنٹیرینز (پی پی پی پی)سے راحیل کامران چیمہ، تحریک لبیک پاکستان (ٹی ایل پی)سے محمد شفاقت، پاکستان نظریاتی پارٹی سے حسن توقیر چیمہ اور دیگر آزاد امیدوار میدان میں ہیں۔

(جاری ہے)

PP-52 سیالکوٹ-IX میں 1696 پولنگ اہلکار اپنے فرائض سرانجام دے رہے ہیں، جبکہ مذکورہ حلقے میں رجسٹرڈ مرد و خواتین ووٹرز کی کل تعداد 2,97,185 ہے (1,57,725 مرد ووٹرز اور 1,39,460 خواتین ووٹرز)۔

حلقے میں پولنگ اسٹیشنز کی کل تعداد 185 ہے جن میں 11 انتہائی حساس، 38 حساس اور 136 نارمل پولنگ اسٹیشنز شامل ہیں۔ حلقہ پی پی 52 سیالکوٹ کے ضمنی انتخاب کی نگرانی کے لیے صوبائی الیکشن کمشنر پنجاب کے دفتر میں کنٹرول روم قائم کر دیا گیا ہے۔ سیالکوٹ کے مذکورہ حلقے میں عوام کی شکایات کے لیے کنٹرول روم 24 گھنٹے فعال رہے گا۔