Live Updates

عیدالاضحی پر فراہمی و نکاسی آب کے خصوصی انتظامات کئے جائیں، سی ای او واٹر کارپوریشن

اتوار 1 جون 2025 19:20

کراچی (اُردو پوائنٹ اخبارتازہ ترین - اے پی پی۔ 01 جون2025ء) میئر کراچی و چیئرمین کراچی واٹر اینڈ سیوریج کارپوریشن بیرسٹر مرتضی وہاب کی ہدایت پر چیف ایگزیکٹو آفیسر واٹر کارپوریشن احمد علی صدیقی نے عید الاضحی کے موقع پر شہر بھر میں فراہمی و نکاسی آب کے خصوصی انتظامات کرنے کے احکامات جاری کر دیے ہیں۔اتوار کو جاری اعلامیہ کے مطابق سی ای او واٹر کارپوریشن نے متعلقہ افسران کو ہدایات جاری کرتے ہوئے کہا ہے کہ عیدالاضحی کے موقع پر ضلعی انتظامیہ منتخب عوامی نمائندوں اور سندھ سالڈ ویسٹ مینجمنٹ بورڈ سمیت تمام ڈسٹرکٹ میونسپل کارپوریشنز کے ساتھ قریبی رابطہ رکھے اور ان کے ساتھ بھرپور تعائون کیا جائے تاکہ قربانی کے جانوروں کی آلائشوں اور دیگر فضلے کی منتقلی ممکن بنائی جا سکے۔

انہوں نے ہدایت دی کہ آلائشوں کو کسی صورت مین ہولز کے قریب یا اندر نہ پھینکا جائے اور نہ ہی سیوریج لائنوں میں ان کا اخراج کیا جائے کیونکہ اس عمل سے سیوریج سسٹم متاثر ہوتا ہے ۔

(جاری ہے)

انہوں نے کہا کہ عید سے قبل شہر بھر میں فراہمی و نکاسی آب کے تمام انتظامات کو مکمل کیے جائیں خصوصا مساجد ،عید گاہوں، امام بارگاہوں اور مدارس کے اطراف میں فراہمی و نکاسی آب کی تمام شکایات کا مکمل خاتمہ کیا جائے، اس ضمن میں تمام اضلاع کے سپرنٹنڈنگ انجینئرز کو ہدایت دی گئی ہے کہ ضلعی انتظامیہ اور متعلقہ اداروں سے مکمل رابطے میں رہیں، ایگزیکٹو انجینئرز واٹر اپنے علاقوں میں پانی کی بلا تعطل فراہمی کو یقینی بنائیں، ایگزیکٹو انجینئرز سیوریج مساجد، عیدگاہوں ،امام بارگاہوں اور مدارس کے اطراف کی مکمل صفائی کو یقینی بنائیں جبکہ ایگزیکٹو انجینئر ورکشاپ جیٹنگ اور سکشن مشینوں کو ہر وقت تیار رکھنے اور ڈرائیوروں کی دستیابی کو یقینی بنائیں اور عید کی عام تعطیلات کے دوران عملے کی حاضری یقینی بنانے کے لیے ڈیوٹی روسٹرز بھی مرتب کریں۔

احمد علی صدیقی نے انچارج ہائیڈرنٹس سیل کو ہدایت دی ہے کہ مساجد ،عیدگاہوں ،امام بارگاہوں اور مدارس کے اطراف پانی سے بھرے واٹر ٹینکرز کی فراہمی کو یقینی بنائیں تاکہ سماجی اور مذہبی تنظیموں کی جانب سے لگائی جانے والی سبیلوں کو بلا معاوضہ پانی فراہم کیا جا سکے ۔