خواتین میں سروائیکل کینسر کی روک تھام کیلئے ہیومین پیپلوما وائرس ویکسین تک رسائی حکومت پنجاب کی بڑی کامیابی ہے‘ مجتبیٰ شجاع الرحمن

لاہور (اُردو پوائنٹ اخبارتازہ ترین - این این آئی۔ 18 اگست2025ء) وزیر خزانہ پنجاب مجتبیٰ شجاع الرحمان نے کہا ہے کہ خواتین میں سروائیکل کینسر کی روک تھام کے لیے ہیومین پیپلوما وائرس ویکسین تک رسائی حکومت پنجاب کی بڑی کامیابی اور وزیر اعلی پنجاب مریم نواز کا اپنے صوبے کی خواتین کی صحت کے تحفظ کے لیے بہترین اقدام ہو گاکیونکہ ایچ پی وی ویکسین خواتین میں کینسر بالخصوص سروائیکل کینسر کے بڑھتے ہوئے رجحان کو کنٹرول کرے گی ۔

ان خیالات کا اظہار صوبائی وزیر نے انسٹیٹیوٹ آف پبلک ہیلتھ لاہور کے زیر اہتمام ایچ پی وی ویکسین کی تعارفی تقریب سے خطاب کے دوران کیا ۔انہوں نے بتایا کہ پاکستان کی تاریخ میں پہلی بار پنجاب وہ صوبہ ہے جو خواتین میں سروائیکل کینسر پر کنٹرول کو سنجیدگی سے لیتے ہوئے اس کی ویکسین تک رسائی کو ممکن بنانے کا رہا ہے ۔

(جاری ہے)

انہوں نے مزید بتایا کہ پنجاب میں ہیومن پیپلوما وائرس ویکسین متعارف کروانے کے لیے پہلے دیگر ممالک میں اس کے استعمال اور افادیت کا جائزہ لیا گیا ہے ۔

ویکسین کو ورلڈ ہیلتھ آرگنائزیشن کی تائید حاصل ہے یہی وجہ ہے کہ پنجاب حکومت انسٹیٹیوٹ آف پبلک ہیلتھ کے تحت نا صرف ویکسین کو صوبے میں متعارف کروا رہی ہے بلکہ ویکسین تک آسان رسائی اور اس سے متعلق مکمل آگاہی کو بھی عام کیا جا رہا ہے۔اس سے قبل صوبائی وزیر نے پبلک ہیلتھ انسٹیٹیوٹ میں دو نئے شعبوں پری وینٹیو پیڈیاٹرکس ڈیپارٹمنٹ اور نیوٹریشن اینڈ ڈائیٹٹکس ڈیپارٹمنٹ کا بھی افتتاح کیا۔

انہوں نے کہا کہ نوزائیدہ بچوں میں بیماریوں کی روک تھام اور غذائیت کی کمی جیسے مسائل سے نمٹنے کے لیے نئے شعبوں کا قیام خوش آئند ہے۔ نیوٹریشن ڈیپارٹمنٹ عوام کو متوازن غذا اور صحت مند طرزِ زندگی کے حوالے سے آگاہی مہیا کرے گا جبکہ پری وینٹیو پیڈیاٹرکس ڈیپارٹمنٹ بچوں میں بیماریوں کی بروقت تشخیص اور قبل از وقت بچا میں اہم کردار ادا کرے گا۔

ڈین انسٹیٹیوٹ آف پبلک ہیلتھ، پروفیسر ڈاکٹر سائرہ افضل نے اپنے خطاب میں کہا کہ ایچ پی وی ویکسین 9 سے 12 سال کی بچیوں کو دی جائے گی تاکہ مستقبل میں انہیں سروائیکل کینسر جیسے مہلک مرض سے محفوظ رکھا جا سکے۔ انہوں نے کہا کہ چھوٹی عمر میں ویکسینیشن خواتین کی زندگیوں کو بچانے میں مثر کردار ادا کرے گی۔معروف ماہرِ طب پروفیسر ڈاکٹر جاوید اکرم نے کہا کہ ویکسین ہمیشہ انسانوں کو فائدہ دیتی ہے اور معاشرے میں پائی جانے والی غلط فہمیاں بے بنیاد ہیں۔

انہوں نے کہا کہ پولیو ویکسین کسی بھی طرح نقصان دہ نہیں، بلکہ یہ بچوں کو زندگی بھر کی معذوری سے بچاتی ہے۔ ان کا کہنا تھا کہ ایچ پی وی ویکسین کے کامیاب تعارف کے لیے عوامی آگاہی انتہائی ضروری ہے تاکہ لوگ توہمات سے نکل کر سائنسی حقائق کو اپنائیں۔تقریب میں انسٹیٹیوٹ آف پبلک ہیلتھ، کنگ ایڈورڈ میڈیکل یونیورسٹی، دیگر میڈیکل کالجز کے فیکلٹی ممبران اور نیشنل و انٹرنیشنل اداروں کے نمائندگان نے شرکت کی۔

اس موقع پر پبلک ہیلتھ انسٹٹ کا نیا شمارہ بھی لانچ کیا گیا ۔تقریب کے اختتام پر نمایاں خدمات انجام دینے والے فیکلٹی ممبران اور معزز مہمانوں کے ساتھ گروپ فوٹو بنوائی انھیں یادگاری شیلڈز تقسیم کی گئیں۔ وزیر خزانہ پنجاب میاں مجتبی شجاع الرحمن نے پالیسی ڈائیلاگ کے مقررین، انسٹیٹیوٹ کے اساتذہ اور طلبہ کے ہمراہ جشنِ آزادی کا کیک کاٹا۔ فضا پاکستان زندہ باد کے نعروں سے گونج اٹھی ۔وزیر خزانہ نے تقریب کو یومِ آزادی کی خوشیوں سے منسلک کرتے ہوئے پاکستان کی سیاسی و عسکری قیادت کو خراجِ تحسین پیش کیا۔