سندھ طاس معاہدے پر حملہ منظور نہیں،اقوام متحدہ میں پاکستان کی آواز بنوں گا

پانی ہماری زندگی ہے اس پرکوئی کمپرومائز قبول نہیں، بھارت کو کسی بھی بہانے اپنی سرحدوں کو نقصان پہنچانے کی اجازت نہیں دیں گے، چیئرمین پیپلزپارٹی بلاول بھٹو زرداری

ثنااللہ ناگرہ پیر 2 جون 2025 20:36

سندھ طاس معاہدے پر حملہ منظور نہیں،اقوام متحدہ میں پاکستان کی آواز ..

اسلام آباد ( اردوپوائنٹ اخبار تازہ ترین۔ آئی پی اے ۔ 02 جون 2025ء ) چیئرمین پیپلزپارٹی بلاول بھٹو زرداری نے کہا ہے کہ سندھ طاس معاہدے پر حملہ منظور نہیں،اقوام متحدہ میں پاکستان کی آواز بنوں گا۔ انہوں نے نیویارک میں میڈیا سے گفتگو کریت ہوئے کہا کہ دنیا کو بتانے آیا ہوں کہ ہم کشمیری عوام کے ساتھ ہیں، نیویارک اور اقوام متحدہ میں پاکستان کی آواز بنوں گا، کشمیریوں کا حق خودداریت کوئی نہیں چھین سکتا، پانی ہماری زندگی ہے اس پر کوئی کمپرومائز قبول نہیں۔

پاکستان ہر قسم کی دہشتگردی کے خلاف ہے، سندھ طاس معاہدے پر حملہ منظور نہیں۔ بھارت کو کسی بھی بہانے اپنی سرحدوں کو نقصان پہنچانے کی اجازت نہیں دیں گے۔ دوسری جانب آزاد جموں و کشمیر کے سابق صدر اورسینئر سفارت کار سردار مسعود خان نے کہا ہے کہ بھارت میدان جنگ اور بیانیہ کی جنگ ہارنے کے بعد اب سفارتی جنگ بھی ہارتا نظر آرہا ہے۔

(جاری ہے)

پاکستان پر جنگ مسلط کرنے کے حوالے سے بھارت کا نقطہ نظر دنیا کے سامنے پیش کرنے کے لئے جو بھارتی پارلیمانی وفود دنیا کے مختلف ممالک کا دورہ کررہے ہیں وہ جھوٹ کا بیانیہ بیان کررہے ہیں اور پاکستان پر جھوٹی الزام تراشی کے ذریعے ہندوستان کی ننگی جارحیت کو چھپانے کے لیے جو زہر افشانی کررہے ہیں اس پر دنیا نے کوئی خاص توجہ نہیں دی ہے۔

ایک ٹیلی ویژن انٹرویو میں سردار مسعود خان نے کہا ہے کہ بھارتی پارلیمانی وفود کو امریکہ اور بعض خلیجی ریاستوں میں کوئی قابل ذکر کامیابی حاصل نہیں ہوئی۔ دوسری طرف پاکستان کا پارلیمانی وفد جس کی قیادت بلاول بھٹو زرداری کر رہے ہیں ایک سچائی کا بیانیہ لیکر گیا ہے جس میں سچائی بھی اور وزن بھی ہے۔ پاکستان کے پارلیمانی وفد کو اپنا بیانیہ مصنوعی طریقے سے بنا سجا کر پیش کرنے کی ضرورت نہیں ہے کیونکہ پاکستان کے پاس ایسے حقائق ہیں جو خود بیان کر رہے ہیں کہ پاکستان کہاں کھڑا ہے اور ہندوستان کہاں کھڑا ہے۔

ساری دنیا تسلیم کر رہی ہے کہ اس جنگ میں پاکستان ہر اعتبار سے سچائی پر کھڑا تھا۔ انہوں نے کہا بھارتی پارلیمانی وفد نے امریکہ میں بیٹھ کر امریکی حکومت کو للکارا ہے اور اس پر تنقید کی ہے، ایسے طرز عمل سے وہ اپنے ملک کا نقطہ نظر کیسے سمجھائیں گے۔