ریلوے اراضی سے غیر قانونی قبضے کا خاتمہ ،کروڑوں روپے مالیت کی قیمتی اراضی واگزار

پیر 2 جون 2025 21:50

راولپنڈی(اُردو پوائنٹ اخبارتازہ ترین - این این آئی۔ 02 جون2025ء) وفاقی وزیر برائے ریلوے محمد حنیف عباسی کی خصوصی ہدایات پر عمل کرتے ہوئے پاکستان ریلوے، راولپنڈی ڈویژن نے ٹیکسلا-حویلیاں سیکشن پر واقع ریلوے اراضی سے غیر قانونی قبضے کے خلاف مؤثر انسداد تجاوزات آپریشن کامیابی سے مکمل کر لیا،یہ کارروائی پراپرٹی اینڈ لینڈ برانچ راولپنڈی اور اسسٹنٹ انسپکٹر آف ورکس/ٹیکسلا کی زیر نگرانی اور ریلوے پولیس کی معاونت سے کی گئی۔

آپریشن کے دوران ہری پور اور سرائے صالح اسٹیشنز کے درمیان ریلوے کی کروڑوں روپے مالیت کی قیمتی اراضی کو غیر قانونی قابضین سے واگزار کرایا گیا۔ واگزار شدہ زمین پر مختلف اقسام کی پکی تعمیرات کی گئی تھیں جن میں گھر، دکانیں اور دیواریں شامل تھیں۔

(جاری ہے)

یہ آپریشن ریلوے کی پالیسی کے مطابق بغیر کسی دباؤ اور امتیاز کے انجام دیا گیا۔ آپریشن سے قبل تمام قانونی تقاضے پورے کیے گئے اور مقامی انتظامیہ کو بھی اعتماد میں لیا گیا تھا۔

اس اقدام کا مقصد ریلوے کی قیمتی اراضی کو محفوظ بنانا اور آئندہ کسی بھی قسم کی تجاوزات کو روکنا ہے۔عوام سے اپیل کی جاتی ہے کہ وہ ریلوے کی زمین پر کسی بھی قسم کی غیر قانونی تعمیرات یا قبضے سے گریز کریں،خلاف ورزی کرنے والوں کے خلاف قانونی کارروائی بلا امتیاز جاری رہے گی۔