بھارت کو سفارتی محاذ پر سبکی، مودی کو جی 7 اجلاس میں شرکت کی دعوت نہ ملی

وزیر اعظم مودی کو ابھی تک باضابطہ طور پر اجلاس میں شرکت کی دعوت نہیں دی گئی

منگل 3 جون 2025 14:15

نئی دلی(اُردو پوائنٹ اخبارتازہ ترین - این این آئی۔ 03 جون2025ء)بھارت کو عالمی سطح پر ایک بار پھر سفارتی تنہائی اور خفت کا سامناکرنا پڑا ہے ۔ بھارتی وزیر اعظم نریندر مودی کو رواں ماہ کینیڈا میں ہونے والے جی سیون سربراہی اجلاس میں شرکت کی دعوت نہیں ملی ہے۔کشمیرمیڈیاسروس کے مطابق کینیڈامیں 15سے 17جون تک جی سیون اجلاس منعقد ہو رہاہے ، تاہم وزیر اعظم مودی کو ابھی تک باضابطہ طور پر اجلاس میں شرکت کی دعوت نہیں دی گئی۔

مودی حکومت کی اقلیت مخالف پالیسیوں، ریاستی سرپرستی میں ملک و بیرون ملک دہشت گردی اور اپنے دشمنوں کو قتل کرانے میں ملوث ہونے کی وجہ سے بھارت کی سفارتی تنہائی میں تیزی سے اضافہ ہو رہاہے۔ادھر کینیڈین حکومت کے جی سیون اجلاس کے ترجمان نے تاحال یہ واضح نہیں کیا کہ بھارتی وزیر اعظم کو اجلاس میں شرکت کی دعوت دی گئی ہے یا نہیں۔

(جاری ہے)

بھارتی میڈیا کا خیال کہ اس دورے کی تیاری کے لیے وقت بہت کم ہے جبکہ سکھ علیحدگی پسندوں کے ممکنہ احتجاج اور کینیڈا سے کشیدہ تعلقات کی وجہ سے بھارت آخری لمحے پر آنے والی کسی بھی دعوت کو قبول نہ کرنے کا فیصلہ کر سکتا ہے۔

واضح رہے کہ گروپ 7کے اجلاس میں دنیا کے سات بڑے صنعتی ممالک فرانس، برطانیہ، جرمنی، اٹلی، جاپان، امریکا اور یورپی کمیشن کے صدور کی شرکت متوقع ہے۔