وفاقی وزیر ریلوے اور ازبکستان کے سفیر علی شیر تختائف کے درمیان ملاقات، ازبکستان-افغانستان-پاکستان ریلوے ٹرانزٹ راہ داری کے منصوبے پر تبادلہ خیال

اسلام آباد (اُردو پوائنٹ اخبارتازہ ترین - اے پی پی۔ 03 جون2025ء) وفاقی وزیر ریلوے محمد حنیف عباسی اور پاکستان میں تعینات ازبکستان کے سفیر علی شیر تختائف کے درمیان ایک اہم ملاقات ہوئی جس میں ازبکستان-افغانستان-پاکستان ریلوے ٹرانزٹ راہ داری کے منصوبے پر تبادلہ خیال کیا گیا۔ اس ملاقات کا مقصد خطے میں ریلوے شعبے میں تعاون کو مزید فروغ دینا اور اس تاریخی منصوبے کی تکمیل کے لیے مشترکہ حکمت عملی وضع کرنا تھا۔

دونوں رہنمائوں نے اس منصوبے کو خطے کی اقتصادی ترقی اور تجارتی روابط کو مستحکم کرنے کے لیے سنگ میل قراردیا۔ تقریباً 850 کلومیٹر طویل ریلوے کنیکٹویٹی کے اس منصوبے پر تعاون کو حتمی شکل دینے کے لیے اتفاق رائے پایا گیا جس میں افغانستان میں 647 کلومیٹر طویل نئی ریلوے لائن کی تعمیر شامل ہے۔

(جاری ہے)

یہ راہ داری وسطی ایشیا اور جنوبی ایشیا کے درمیان پہلا براہ راست ریلوے کوریڈور ہوگی جو خطے میں تجارتی اور اقتصادی تعاون کی نئی راہیں کھولے گی۔

وزیر ریلوے محمد حنیف عباسی نے اس موقع پر کہا کہ منصوبے کی تکمیل کے بعد پاکستان کو وسطی ایشیا تک سب سے مختصر اور موثر ترین راستہ میسر ہوگا، جو نہ صرف تجارتی حجم میں اضافہ کرے گا بلکہ خطے کی معیشت کو بھی مضبوط بنیادوں پر استوار کرے گا۔ انہوں نے مزید کہا کہ یہ ریلوے کوریڈور تجارت کے وقت اور لاگت میں نمایاں کمی کا باعث بنے گا جس سے تمام فریقین کو فائدہ پہنچے گا۔

انہوں نے کہا کہ اس راہ داری کے تحت سالانہ 15 ملین ٹن سامان کی ترسیل کی صلاحیت متوقع ہے، جو خطے میں برآمدات اور درآمدات کے حجم کو بے مثال حد تک بڑھانے میں مددگار ثابت ہوگی۔ وزیر ریلوے نے اس منصوبے کو پاکستان کی بندرگاہوں سے وسطی ایشیا کو براہ راست رسائی فراہم کرنے والا ایک تاریخی سنگ میل قرار دیا جو عالمی تجارتی منڈیوں تک آسان رسائی کو ممکن بنائے گا۔

مزید برآں وزیر ریلوے نے اس منصوبے کی اہمیت کو چین کے بیلٹ اینڈ روڈ انیشیٹو کے تحت خطے میں سرمایہ کاری اور انفراسٹرکچر کی ترقی کا اہم جزو قرار دیا۔ انہوں نے کہا کہ یہ منصوبہ خطے میں نہ صرف معاشی روابط کو مستحکم کرے گا بلکہ علاقائی امن اور استحکام میں بھی کلیدی کردار ادا کرے گا۔ملاقات میں ازبکستان کے سفیر علی شیر تختائف نے پاکستان کے ریلوے سیکٹر میں سرمایہ کاری کے وسیع مواقع اور دونوں ممالک کے درمیان تجارتی تعلقات کو فروغ دینے کے امکانات پر روشنی ڈالی۔

انہوں نے اس بات پر زور دیا کہ مشترکہ تعاون سے خطے میں معاشی خوشحالی کو فروغ دیا جا سکتا ہے اور دونوں ممالک کی عوام کے لیے روزگار کے نئے مواقع پیدا کیے جا سکتے ہیں۔دونوں رہنمائوں نے افغانستان میں امن و استحکام کے فروغ کے لیے اس منصوبے کے ممکنہ مثبت اثرات کو سراہا اور اسے خطے کے لیے ترقی اور امن کا ایک روشن مستقبل قرار دیا۔ اس موقع پر انہوں نے ریلوے کے شعبے میں تعاون کو مزید گہرا کرنے اور مشترکہ ترقیاتی منصوبوں پر کام جاری رکھنے کا عزم ظاہر کیا۔

وزیر ریلوے محمد حنیف عباسی نے ازبکستان کے تجربات سے استفادہ کرتے ہوئے پاکستان میں ریلوے کے نظام کو جدید خطوط پر استوار کرنے اور ریلوے کی کارکردگی کو بہتر بنانے کے لیے بھرپور اقدامات کرنے کا وعدہ کیا۔ملاقات کے اختتام پر دونوں فریقین نے علاقائی تعاون کو فروغ دینے، اقتصادی راہداریوں کو فعال بنانے اور باہمی ترقی کے لیے مشترکہ منصوبوں پر کام جاری رکھنے کے عزم کا اعادہ کیا۔