اٹک ،ایئر یونیورسٹی کامرہ کیمپس نےسالانہ فائنل ایئر پروجیکٹس اوپن ہاؤس کا کامیاب انعقاد کیا

منگل 3 جون 2025 21:36

اٹک (اُردو پوائنٹ اخبارتازہ ترین - اے پی پی۔ 03 جون2025ء) ایئر یونیورسٹی کامرہ کیمپس نےسالانہ فائنل ایئر پروجیکٹس اوپن ہاؤس کا کامیاب انعقاد کیا، جس میں فارغ التحصیل ہونے والے طلبہ نے اپنی تحقیقات اور تخلیقی صلاحیتوں کا عملی مظاہرہ کیا۔تقریب کے مہمانِ خصوصی ایئر مارشل (ر) فرحت حسین خان، ہلالِ امتیاز (ملٹری)، سابقہ صدر ایئر یونیورسٹی اور ایگزیکٹو ڈائریکٹر نیشنل ایرو ناٹیکل اینڈ انوویشن ٹیکنالوجی بیسڈ انڈسٹریل پارک (NASTP) تھے۔

اپنے خطاب میں ایئر مارشل فرحت حسین خان نے کہا کہ اوپن ہاؤس ایئر یونیورسٹی کے اعلیٰ تعلیمی اور فنی معیار کا عکاس ہے۔ طلبہ کے تحقیقی کام اور ان کی تخلیقی صلاحیتیں اس بات کا ثبوت ہیں کہ وہ پاکستان کی سماجی و اقتصادی ترقی میں مؤثر کردار ادا کرنے کے لیے تیار ہیں۔

(جاری ہے)

تقریب کا آغاز ڈائریکٹر کامرہ کیمپس، ایئر وائس مارشل (ر) شمس الحق، ہلالِ امتیاز (ملٹری) کے استقبالیہ خطاب سے ہوا۔

انہوں نے مختلف قومی اداروں سے آئے ہوئے مہمانوں کو خوش آمدید کہا اور طلبہ کی محنت و عزم کو سراہا۔انہوں نے کہا کہ اوپن ہاؤس 2025 کا مقصد صنعت اور اکیڈمی کے درمیان فعال تعلق کو فروغ دینا اور طلبہ کو اپنی صلاحیتوں کے عملی مظاہرے کا موقع فراہم کرنا تھا۔ انہوں نے کہا کہ کیمپس چیف اف ائر سٹاف کے وژن کے مطابق کام کر رھا ھے ۔ اس تقریب میں ایسے منصوبے بھی شامل تھے جو براہ راست ملکی دفاع، معیشت اور صنعت سے متعلق حقیقی مسائل کا حل پیش کرتے ہیں۔

اس موقع پر مختلف معروف اداروں کی نمائندہ گان موجود تھی، جن میں پاکستان ایئروناٹیکل کمپلیکس ، پاکستان ایٹمی توانائی کمیشن ، نیشنل انجینئرنگ و سائنسی کمیشن ، اور پاکستان ایئر فورس (PAF) شامل ہیں۔ اداروں کے نمائندگان نے طلبہ کے منصوبوں میں گہری دلچسپی لی اور اُن کی تکنیکی مہارت کو سراہا۔ایئر یونیورسٹی کامرہ کیمپس ملکی ضروریات اور صنعتی تقاضوں کو مدنظر رکھتے ہوئے طلبہ کی تخلیقی سوچ، جدت طرازی اور عملی مہارتوں کو فروغ دینے کے لیے پرعزم ہے۔ ڈائرکٹر کیمپس ائر وائس مارشل شمس الحق نے مہمان خصوصی اور باقی ماندہ مہمانوں کا شکریہ ادا کیا۔\378