Live Updates

تحریک انصاف کی حکومت نے خیبر پختونخوا کے نوجوانوں کو مایوسی کی دلدل میں دھکیل دیا ہے،عنایت اللہ خان

خیبر پختونخوا میں اب تک ایک ہزار ارب روپے کی خطیر رقم بدعنوانی کی نذر ہو چکی، نیب اور اداروں کی خاموشی سوالیہ نشان ہے ،صوبائی امیر

منگل 3 جون 2025 20:05

سوات (اُردو پوائنٹ اخبارتازہ ترین - این این آئی۔ 03 جون2025ء) امیر جماعت اسلامی خیبر پختونخوا شمالی اور سابق سینئر وزیر عنایت اللہ خان نے کہا ہے کہ پاکستان تحریک انصاف کی حکومت نے خیبر پختونخوا کے نوجوانوں کو مایوسی کی دلدل میں دھکیل دیا ہے۔ پی ٹی آئی حکومت کا وطیرہ ہی کرپشن اور بری گورننس رہا ہے، جس کا ثبوت یہ ہے کہ خود پی ٹی آئی کے اندر سے لوگ کرپشن کے ثبوت اور گواہیاں دے رہے ہیں۔

خیبر پختونخوا میں اب تک ایک ہزار ارب روپے کی خطیر رقم بدعنوانی کی نذر ہو چکی ہے، جس پر نیب اور دیگر اداروں کی خاموشی بھی سوالیہ نشان بن چکی ہے۔ان خیالات کا اظہار انہوں نے سوات کی تحصیل کبل میں نیوز کانفرنس کرتے ہوئے کیا ۔ اس موقع پر امیرجماعت اسلامی سوات حمیدا لحق اور پارٹی کے دیگر رہنما بھی موجود تھے ۔

(جاری ہے)

عنایت اللہ خان نے کہا کہ قائداعظم محمد علی جناح نے ریاستوں سے جو وعدے کیے تھے، ان میں خاص طور پر ان علاقوں کو خصوصی حیثیت دینے کا ذکر تھا۔

موجودہ حکومت کو ان وعدوں کی پاسداری کرنی چاہیے، ورنہ عوام کا اعتماد مکمل طور پر ختم ہو جائے گا۔انہوں نے کہاکہ ملاکنڈ ڈویژن ایک پسماندہ اور دہشت گردی سے شدید متاثرہ خطہ ہے، جسے ہمیشہ سے وفاقی و صوبائی حکومتوں کی طرف سے خصوصی توجہ درکار رہی ہے۔ تاہم اب اس علاقے پر ٹیکسز لاگو کرنے کی تیاری کی جا رہی ہے، جو ناقابل قبول ہے۔ عنایت اللہ خان نے مطالبہ کیا کہ ملاکنڈ ڈویژن کے لیے ٹیکس استثنی میں فوری اور مستقل توسیع دی جائے، ورنہ جماعت اسلامی بھرپور عوامی تحریک شروع کرے گی۔

انہوں نے خبردار کیا کہ اگر حکومت نے ٹیکس کے نفاذ کا فیصلہ واپس نہ لیا تو 10 جون کے بعد جماعت اسلامی کے کارکنان اور عوام ممبران اسمبلی کے گھروں کا گھیراو کریں گے۔ انہوں نے کہا کہ ہم پرامن اور آئینی دائرہ کار میں رہ کر جدوجہد پر یقین رکھتے ہیں، لیکن عوام کے معاشی حقوق پر سمجھوتہ نہیں کریں گے۔انہوں نے نوجوانوں کو مخاطب کرتے ہوئے کہا کہ جماعت اسلامی ہر فورم پر ان کے حقوق کے لیے آواز بلند کرتی رہے گی، اور وہ وقت دور نہیں جب ایک باکردار، بااصول اور کرپشن فری پاکستان کا خواب شرمند تعبیر ہوگا۔