وزیرِ مملکت برائے کرپٹو و بلاک چین کی امریکی ڈیجیٹل اثاثہ جات کونسل کے ایگزیکٹو ڈائریکٹر سے ملاقات،بٹ کوائن کے انضمام اور دیگر امور بارے تبادلہ خیال کیا

اسلام آباد (اُردو پوائنٹ اخبارتازہ ترین - اے پی پی۔ 04 جون2025ء) وزیرِ مملکت برائے کرپٹو و بلاک چین اور پاکستان کرپٹو کونسل کے سی ای او بلال بن ثاقب نے واشنگٹن ڈی سی میں صدر ڈونلڈٹرمپ کے ڈیجیٹل اثاثہ جات کونسل کے ایگزیکٹو ڈائریکٹر رابرٹ بوہائنز سے وائٹ ہاؤس میں ملاقات کی جس میں بٹ کوائن کے انضمام، ڈیجیٹل اثاثہ جات کی سٹریٹجک ہم آہنگی اور غیرمرکزی ڈیجیٹل بنیادی ڈھانچے کے مستقبل بارے گفتگو ہوئی۔

یہ ملاقات پاکستان کی جانب سے لاس ویگاس میں منعقدہ بٹ کوائن 2025 کانفرنس میں اپنی سٹریٹجک بٹ کوائن ریزرو کے اعلان کے بعدہوئی ، اس اعلان کے ساتھ ہی پاکستان نے ایشیا میں بٹ کوائن کو ریاستی اثاثے کے طور پر اپنانے والے اولین ممالک میں شامل ہونے کا اعزاز حاصل کیا ۔

(جاری ہے)

وزیرمملکت نے کہاکہ پاکستان کو ڈیجیٹل اثاثوں کے میدان میں گلوبل ساؤتھ کا رہنما بناناہمارا خواب ہے، ہم نہ صرف سٹریٹجک بٹ کوائن ریزرو کے ذریعے نئی معیشت کی بنیاد رکھ رہے ہیں بلکہ کرپٹو مائننگ اور مصنوعی ذہانت کے ڈیٹا زونز کے لیے قومی بنیادی ڈھانچہ بھی بنارہے ہیں، یہ محض وژن نہیں بلکہ ایک قابلِ عمل خاکہ ہے جس سے پاکستان جدید ڈیجیٹل معیشت کے دورمیں داخل ہورہاہے۔

ملاقات میں فریقین نے دونوں ملکوں کے درمیان ڈیجیٹل اثاثہ جات، ریگولیٹری ہم آہنگی اور جدید مالیاتی ٹیکنالوجیز پر اشتراک کارکو مزید فروغ دینے کی خواہش کا اظہار کیا۔ انہوں نے نوجوانوں کو بااختیار بنانے اور معیشت میں شمولیت بڑھانے کے لیے بلاک چین پر مبنی جدت کاری کے نظام کابھی جائزہ لیا۔ وزیرمملکت نے وائٹ ہاؤس کونسل آفس سے بھی ملاقات کی جس میں قانونی و پالیسی پہلوؤں کاجائزہ لیاگیا۔

انہوں نے کہاکہ پاکستان کی وسیع تر حکمتِ عملی میں 2000 میگاواٹ بجلی بٹ کوائن مائننگ اور مصنوعی ذہانت کے ڈیٹا زونز کے لیے مختص کرنا شامل ہے تاکہ فاضل توانائی کو روزگار، اقتصادی ترقی اور ڈیجیٹل بنیادی ڈھانچے میں تبدیل کیاجاسکے۔ان کا کہنا تھا کہ عالمی سطح پر بدلتے ریگولیٹری منظرنامے کے دوران پاکستان واضح، فیصلہ کن اور جرات مندانہ اقدامات کے ذریعے صفِ اول میں آ کر ایک نئی ڈیجیٹل اقتصادی کہانی رقم کر رہا ہے جہاں ریاستی پالیسی، نجی اختراع اور بین الاقوامی اشتراک باہم مل کر مستقبل کی کرپٹو معیشت کی بنیاد رکھ رہے ہیں۔

واضح رہے کہ رابرٹ بوہائنز صدر ٹرمپ کے خصوصی مشیرانِ کی کونسل میں ڈیجیٹل اثاثہ جات کے قومی پالیسی سازی کے سربراہ ہیں،انہیں جنوری 2025 میں تعینات کیا گیا، وہ کونسل کے چیئرمین ڈیوڈ ساچز کے ہمراہ امریکا کو کرپٹو اور بلاک چین میں عالمی قائد بنانے کے مشن پر کاربند ہیں۔\932