Live Updates

مقبوضہ جموں وکشمیر، مختلف اضلاع میں ’’این آئی اے ‘‘ کے چھاپے

پہلگام آپریشن کے بعد سے اب تک 3ہزار سے زائد کشمیریوں کو گرفتار کیا جاچکا ہے

جمعرات 5 جون 2025 14:23

سری نگر(اُردو پوائنٹ اخبارتازہ ترین - این این آئی۔ 05 جون2025ء) بھارت کے غیر قانونی زیر قبضہ جموں وکشمیر میں بدنام زمانہ بھارتی تحقیقاتی ادارے نیشنل انویسٹی گیشن ایجنسی ( این آئی ای) نے جمعرات کو متعدد مقامات پر گھروں پر چھاپے مارے ہیں۔کشمیر میڈیا سروس کے مطابق این آئی اے کی ٹیموں نے بھارتی پیرا ملٹری اہلکاروں کے ہمراہ یہ چھاپے پلوامہ، کولگام، شوپیاں، بارہمولہ اور کپواڑہ اضلاع میں مارے ۔

(جاری ہے)

بھارتی پولیس حکام نے کہا ہے چھاپے آزاد ی کے حامی کشمیریوں کے گھروں پر مار ے گئے۔ آخری اطلاعات تک چھاپوں کا سلسلہ جاری تھا۔یاد رہے کہ مودی حکومت نے پہلگام فالس فلیگ آپریشن کی آڑ میں آزادی پسند کشمیریوں کے خلاف جبر و استبداد کی کارروائیوں میں تیزی لائی ہے۔ بھارتی فورسز اور تحقیقاتی اداروں کی طرف سے جاری محاصرے اور تلاشی کی کارروائیوں اور گھروں پر چھاپوں نے کشمیریوں کی زندگی اجیرن بنا رکھی ہے۔ پہلگام آپریشن کے بعد سے اب تک 3ہزار سے زائد کشمیریوں کو گرفتار کیا جاچکا ہے جن میں زیادہ تر نوجوان شامل ہیں۔