شہر قائد میں بھی ہفتہ کو عید الاضحی کا پہلا دن مذہبی جو ش و جذبہ سے منایا گیا

کراچی (اُردو پوائنٹ اخبارتازہ ترین - اے پی پی۔ 07 جون2025ء) ملک بھر کی طرح شہر قائد میں بھی ہفتہ کو عید الاضحی کا پہلا دن مذہبی جوش و جذبہ سے منایا گیا۔دن کا آغاز نماز فجر کے بعد مساجد میں امت مسلمہ کی فلاح وبہبود اور ملک کی سلامتی، ترقی اور خوشحالی کیلئے خصوصی دعاوں سے ہوا۔شہر بھر میں عید کی نماز کے ہزاروں چھوٹے بڑے اجتماعات منعقد ہوئے جہاں لاکھوں مسلمانوں نے نماز عید ادا کی۔

نماز عید کے اجتماعات میں علمائے کرام نے اپنے خطبات میں حضرت ابراہیم علیہ السلام اور حضرت اسماعیل علیہ السلام کی عظیم قربانی کی اہمیت اور فلسفے پرروشنی ڈالی۔نماز عید کے اجتماعات میں ملکی ترقی و خوشحالی کے لئے خصوصی دعائیں کی گئیں۔نماز عید کے موقع پر سیکورٹی کے سخت انتظامات کئے گئے تھے۔

(جاری ہے)

نماز عید کے بعد مسلمانوں نے سنت ابراہیمیؑ پر عمل کرتے ہوئے اللہ کی راہ میں جانور قربان کئے جن میں بکریاں، دنبے، بیل اور اونٹ وغیرہ شامل تھے۔

بعد ازاں شہریوں کی بڑی تعداد نے قبرستان کا رخ بھی کیا جہاں انہوں نے اپنے پیاروں کی قبروں پر فاتحہ خوانی کی۔قربانی کے بعد عزیز و اقارب اور غرباءمیں لوگوں نے قربانی کا گوشت بھی تقسیم کیا۔اس موقع پر بلدیاتی اداروں نے آلائشیں اٹھانے کے انتظامات کئے تھے۔عید کے پہلے دن لوگوں نے بڑی تعداد میں ساحل سمندر، تفریحی مقامات کا رخ بھی کیا جس میں بچوں اور خواتین کی بڑی تعداد شامل تھی۔

گورنرہاوس سے جاری اعلامیہ کے مطابق گورنرسندھ کامران خان ٹیسوری کی ہدایت پر گورنرہاﺅس میں عیدالاضحی کے پہلے روز قربانی کی گئ۔گورنرہاﺅس میں اونٹ، بیل اور بکروں کی قربانی کی گئی۔گورنرسندھ کی ہدایت پر قربانی کا گوشت مستحقین اور ضرورت مندوں میں تقسیم کیا گیا۔واضح رہے کہ گورنرسندھ فریضہ حج کی ادائیگی کے لئے سعودی عرب میں موجود ہیں۔

ایڈیشنل آئی جی پی کراچی جاوید عالم اوڈھو کی ہدایات پر شہر بھر کی مساجد، امام بارگاہوں اور عید گاہوں پر عید کے حوالے سے سخت حفاظتی اقدامات کئے گئے تھے۔ترجمان کراچی پولیس کے مطابق عید الاضحی کے موقع پر شہر بھر میں مجموعی طورپر 15 ہزار 743 سے زائد پولیس افسران و اہلکار سیکیورٹی ڈیوٹی پر تعینات کئے گئے ہیں۔نماز کے موقع پر ایسٹ زون میں 4,091 اہلکار، ساوتھ زون میں 4,187 اہلکار اور ویسٹ زون میں 3,484 اہلکار تعینات کئے گئے تھے جبکہ شہر بھر میں قربانی کی کھالوں کے کلیکشن پوائنٹس اور حساس مقامات پر 3,981 افسران و جوان عید کے تین دن ڈیوٹی سر انجام دینگے۔

سیکیورٹی اقدامات کے سلسلے میں 5,105 پیکٹس، 590 پولیس موبائلز اور 1,340 موٹر سائیکلیں بھی سیکیورٹی ڈیوٹی پر مامور کی گئیں تاکہ گشت اور رسپانس کے عمل کو موثر بنایا جاسکے۔کراچی پولیس چیف نے ٹریفک پولیس کو عید کے موقع پر ٹریفک کی بلا تعطل روانی کے حوالے سے بھی خصوصی ہدایات جاری کیں