راولپنڈی میں بھی عیدالاضحیٰ مذہبی عقیدت و احترام کے ساتھ منائی گئی

راولپنڈی (اُردو پوائنٹ اخبارتازہ ترین - اے پی پی۔ 07 جون2025ء) ملک بھر کی طرح راولپنڈی میں بھی عیدالاضحیٰ مذہبی عقیدت و احترام کے ساتھ منائی گئی۔ شہر اور ضلع بھر میں نماز عید کے بڑے اجتماعات کا انعقاد کیا گیا جن میں 604 مساجد، 72 امام بارگاہیں اور 62 کھلے مقامات شامل تھے۔ مرکزی اجتماعات جامع مسجد حنفیہ، عیدگاہ، جامعہ اسلامیہ صدر، جامعہ رضویہ ضیاءالعلوم سیٹلائٹ ٹاؤن، جامعہ سراجیہ اصغر مال، جامع مسجد احاطہ فضل الٰہی صدر اور چونگی نمبر 22 میں ہوئے جہاں ہزاروں فرزندان اسلام نے شرکت کی۔

علمائے کرام نے اپنے خطبات میں حضرت ابراہیم علیہ السلام اور حضرت اسماعیل علیہ السلام کی عظیم قربانی کے فلسفے کو اجاگر کرتے ہوئے اتحاد امت، ملکی سلامتی اور ترقی کے لیے خصوصی دعائیں کرائیں۔

(جاری ہے)

خطبہ عید کے دوران دہشت گردی کے خلاف نبرد آزما مسلح افواج کو خراج تحسین پیش کیا گیا اور پاک فوج کے شہداء کے لیے دعائے مغفرت کی گئی۔ عید کی نماز کی ادائیگی کے بعد شہریوں نے سنت ابراہیمی پر عمل کرتے ہوئے بکروں، دنبوں، بیلوں اور اونٹوں کی قربانی کی۔

مختلف دینی و فلاحی اداروں نے اجتماعی قربانی کا انتظام کیا جبکہ کئی علاقوں میں اجتماعی قربان گاہیں قائم کی گئیں۔ ریجنل پولیس آفیسر (آر پی او) راولپنڈی بابر سرفراز الپا، سٹی پولیس آفیسر (سی پی او) سید خالد ہمدانی، ڈپٹی کمشنر حسن وقار چیمہ، ڈویژنل ایس پیز اور دیگر سینئر افسران نے عید کی نماز پولیس لائنز ہیڈکوارٹرز کی جامع مسجد میں ادا کی۔

اس موقع پر امت مسلمہ کے اتحاد، ملکی سلامتی اور شہداء کے درجات کی بلندی کے لیے خصوصی دعائیں کی گئیں۔ نماز کے بعد آر پی او، سی پی او اور ڈپٹی کمشنر نے پولیس افسران و اہلکاروں سے عید ملی اور ان کے جذبے کو سراہا۔ کانسٹیبل الطاف حسین شہید میس میں پولیس اہلکاروں کے لیے خصوصی کھانے کا انتظام بھی کیا گیا جس میں اعلیٰ افسران نے بھی شرکت کی۔

عیدالاضحیٰ کے موقع پر راولپنڈی پولیس نے شہر بھر میں فول پروف سکیورٹی انتظامات کیے۔ نماز عید کے اجتماعات کے لیے 2700 پولیس اہلکاروں کو تعینات کیا گیا جبکہ 604 مساجد، 62 کھلے مقامات اور 72 امام بارگاہوں پر خصوصی سکیورٹی فراہم کی گئی۔ آر پی او اور سی پی او نے بہترین سکیورٹی اقدامات پر پولیس فورس کو سراہا۔ سی پی او خالد ہمدانی نے کہا کہ شہریوں کی جان و مال کی حفاظت ہماری اولین ترجیح ہے۔

جس کے لیے پولیس فورس چوبیس گھنٹے متحرک ہے۔ ریسکیو 1122 کی ٹیمیں بھی کسی ہنگامی صورتحال سے نمٹنے کے لیے ہائی الرٹ رہیں اور شہریوں کو فوری طبی امداد فراہم کرنے کے لیے متحرک رہیں۔ راولپنڈی ویسٹ مینجمنٹ کمپنی نے قربانی کے جانوروں کی آلائشوں اور باقیات کو بروقت ٹھکانے لگانے کے لیے خصوصی انتظامات کیے۔ صفائی کا عملہ شہر بھر میں متحرک رہا جس پر شہریوں نے اطمینان کا اظہار کیا۔

عوام نے حکومتی اداروں، سیکیورٹی فورسز، صفائی عملے اور امدادی ٹیموں کی کارکردگی کو سراہتے ہوئے عید کے پر امن انعقاد پر خوشی کا اظہار کیا۔ راولپنڈی میں عیدالاضحی نہایت پر امن، مذہبی جوش و جذبے اور مثالی انتظامات کے ساتھ منائی گئی۔ عوامی، دینی، سکیورٹی اور انتظامی سطح پر بہترین ہم آہنگی دیکھنے میں آئی۔