سابق کمشنر ہزارہ سید ظہیرالاسلام کی خدمات کو خراجِ تحسین پیش کرنے کیلئے ماڈرن ایج سکول ایبٹ آباد میں تقریب

ایبٹ آباد (اُردو پوائنٹ اخبارتازہ ترین - اے پی پی۔ 08 جون2025ء) ایلاف کلب ایبٹ آباد، بزم علم و فن پاکستان ہزارہ اور ماڈرن ایج پبلک سکول اینڈ کالج کے اشتراک سے سابق کمشنر ہزارہ سید ظہیرالاسلام کی شاندار خدمات کو خراج تحسین پیش کرنے کیلئے ایک پروقار تقریب کا انعقاد کیا گیا۔ علمی، ادبی، سماجی و انتظامی حلقوں کی ممتاز شخصیات کی بڑی تعداد نے تقریب میں شرکت کی اور سیدظہیرالاسلام کی بے لوث قومی خدمات کو سراہا۔

تقریب کی نظامت معروف ماہر تعلیم اور دانشور ڈاکٹر عامر سہیل نے انجام دی جبکہ محفل کا آغاز ساجد محمود اعوان کی خوش الحان تلاوت سے ہوا۔ بزم علم و فن کے صدر اور میزبان محفل عبدالواحد میر نے اپنے کلمات میں سابق کمشنر ہزارہ سید ظہیرالاسلام کو خراج تحسین پیش کرتے ہوئے کہا کہ سید ظہیرالاسلام کی خدمات کا احاطہ الفاظ میں ممکن نہیں۔

(جاری ہے)

بطور ڈپٹی کمشنر، کمشنر ہزارہ اور سیکریٹری بلدیات انہوں نے جس جانفشانی، دیانتداری اور لگن سے فرائض سرانجام دیئے وہ آنے والی نسلوں کیلئے ایک مشعل راہ ہیں۔

معروف شاعر احمد ریاض نے سید ظہیرالاسلام کی شخصیت اور خدمات پر مبنی ایک خوبصورت اور پ±رتاثیر نظم پیش کی جسے شرکاءنے بے حد سراہا۔ سپورٹس مین محمد توفیق نے کہا کہ سید ظہیرالاسلام جیسے سچے، ایماندار اور عوام دوست افسر خیبر پختونخوا کی بیوروکریسی میں ایک مثال کی حیثیت رکھتے ہیں، ان کی زندگی اور خدمات پر ایک جامع کتاب لکھی جانی چاہئے تاکہ نوجوان نسل کو رہنمائی مل سکے۔

میجر (ر) امان اﷲ نے کہا کہ سید ظہیرالاسلام کی خدمات کا اعتراف صرف لمحوں یا گھنٹوں میں نہیں کیا جا سکتا بلکہ ان کی زندگی کا ہر پہلو تحقیق اور خراج تحسین کا متقاضی ہے۔ معزز مہمانِ اعزاز اقبال قریشی نے کہا کہ شاہ صاحب کے دفتر کے دروازے ہمیشہ عوام کیلئے کھلے رہے، ہر سائل کو عزت اور ہر فریادی کو تسلی ملی، اب جب وہ صوبائی محتسب کے منصب پر فائز ہونے جا رہے ہیں تو عوام کی خدمت کے نئے باب رقم ہوں گے۔

آخر میں مہمان خصوصی سید ظہیرالاسلام نے اپنے خطاب میں کہا کہ میری زندگی کا مقصد ہمیشہ مظلوم کی فریاد سن کر اسے سہارا دینا رہا ہے، موصوف نے کبھی دولت کو فوقیت نہیں دی بلکہ وطن سے وفاداری اور عوامی خدمت کو اپنا شعار بنایا، آج میرا عزم ہے کہ جس عہدے پر بھی رہوں اپنی مٹی، اپنے صوبہ اور بالخصوص ہزارہ کے عوام کی خدمت مزید جوش و جذبہ سے کروں۔

انہوں نے کہا کہ ملک اس وقت کئی چیلنجز سے دوچار ہے مگر بحیثیت قوم ہم اﷲ کے فضل و کرم سے اپنے سے کئی گنا بڑے دشمن کا مقابلہ کرنے کی پوری صلاحیت رکھتے ہیں، آیئے اپنے آس پاس نظر ڈالیں، کسی کو ہماری مدد کی ضرورت ہے تو آگے بڑھیں، محبتیں بانٹیں، خوشیاں پھیلائیں، یہی اصل خدمت ہے۔ تقریب کے اختتامی لمحات میں معزز مہمانان گرامی میں ماڈرن ایج کی طرف سے تحائف پیش کئے گئے۔