خیبرپختونخواہ کا بجٹ 13جون کو پیش کیا جائے گا، ٹیکس فری ہونے کا دعویٰ

پشاور ( اُردو پوائنٹ اخبارتازہ ترین۔ 10 جون 2025ء ) خیبرپختونخواہ حکومت نے صوبائی بجٹ 13جون کو پیش کرنے کا اعلان کردیا۔ وزیر اعلیٰ خیبرپختونخواہ علی امین گنڈاپور نے اعلان کیا ہے کہ خیبر پختونخواہ میں ٹیکس فری بجٹ دیں گے، عوام پر کوئی نیا ٹیکس نہیں لگایا جائے گا۔ اسی حوالے سے صوبائی مشیر خزانہ مزمل اسلام کا کہنا ہے کہ خیبر پختونخواہ کے لیے اگلے مالی سال کا بجٹ 13 جون کو پیش کیا جائے گا، بجٹ کا حجم تقریباً 2 ہزار ارب روپے سے زیادہ ہوگا، جس میں اخراجات کا تخمینہ 1800 ارب روپے سے زیادہ کا لگایا گیا ہے، ترقیاتی اخراجات میں 40 فیصد اضافہ کر رہے ہیں، تعلیمی ایمرجنسی، صحت کارڈ اور بس سروس کیلئے زیادہ فنڈ مختص کیا جائے گا۔

دوسری طرف بتایا جارہا ہے کہ قومی اسمبلی اور سینیٹ کے اجلاس آج طلب کرلیے گئے ہیں، پارلیمنٹ کے دونوں ایوانوں میں بجٹ پیش کیا جائے گا، قومی اسمبلی اور سینیٹ کے اجلاس کا ایجنڈا جاری کر دیا گیا، وفاقی وزیر خزانہ آئندہ مالی سال کا 17 ہزار 600 ارب روپے کا وفاقی بجٹ پیش کریں گے، سپیکر سردار ایاز صادق کی زیر صدارت قومی اسمبلی کا بجٹ اجلاس آج شام 5 بجے ہوگا، قومی اسمبلی کے اجلاس کا 4 نکاتی ایجنڈا بھی جاری کر دیا گیا ہے۔

(جاری ہے)

معلوم ہوا ہے کہ وزیر خزانہ محاصل سمیت دیگر دستاویزات قومی اسمبلی میں پیش کریں گے، قومی اسمبلی میں بجٹ پیش کرنے سے قبل شام 4 بجے وزیراعظم شہباز شریف کی زیر صدارت وفاقی کابینہ کا خصوصی اجلاس ہوگا جس میں بجٹ مسودے اور سرکاری ملازمین کی تنخواہوں و پنشن میں اضافے کی منظوری دی جائے گی جب کہ سینیٹ کا اجلاس آج شام 6 بجے ہوگا وزیر خزانہ محمد اورنگزیب ایوان بالا میں بھی آج ہی بجٹ پیش کریں گے۔

ادھر پاکستان تحریک انصاف نے آج قومی اسمبلی میں بجٹ پیش ہونے کے موقع پر احتجاج کی تیاری مکمل کرلی ہے، ذرائع کا کہنا ہے کہ پی ٹی آئی کی جانب سے بجٹ کے خلاف مؤثر احتجاج کی منصوبہ بندی کی گئی ہے، اجلاس میں پارٹی کی سینئر قیادت اور ارکان پارلیمنٹ کو شرکت کی ہدایت جاری کر دی گئی ہیں، پارلیمنٹ کے اندر بھرپور آواز اٹھانے کے ساتھ ساتھ سڑکوں پر بھی ممکنہ طور پر احتجاج کیا جائے گا۔

چیئرمین تحریک انصاف بیرسٹر گوہر علی خان کا کہنا ہے کہ پی ٹی آئی اس بجٹ کو کسی صورت قبول نہیں کرے گی، بجٹ میں مہنگائی کے خاتمے اور کفایت شعاری کا کوئی خاکہ موجود نہیں ہے، معاشی اصلاحات کے لیے بھی حکومت نے کوئی سنجیدہ قدم نہیں اٹھایا، ملک کی معیشت پہلے ہی نازک صورتحال کا شکار ہے، موجودہ حکومت کی پیش کردہ مالی پالیسیوں میں بہتری کا کوئی راستہ دکھائی نہیں دیتا۔