Live Updates

پاکستان نے مشکل حالات کے باوجود نہ صرف گزشتہ سال اپنے معاشی اہداف پورے کیے بلکہ عوام کے لیے ریلیف کو بھی یقینی بنایا، بلال اظہر کیانی

بدھ 11 جون 2025 02:00

اسلام آباد (اُردو پوائنٹ اخبارتازہ ترین - اے پی پی۔ 11 جون2025ء) وزیر مملکت برائے ریلوے بلال اظہر کیانی نےکہا ہےکہ پاکستان نے مشکل حالات کے باوجود نہ صرف گزشتہ سال اپنے معاشی اہداف پورے کیے بلکہ عوام کے لیے ریلیف کو بھی یقینی بنایا۔ منگل کو ایک نجی ٹی وی چینل سے گفتگو کرتے ہوئے انہوں نے کہا کہ سٹرکچرل اقتصادی اصلاحات کلیدی توجہ ہیں۔

(جاری ہے)

انہوں نے مزید کہا کہ معاشی رفتار کو درست کرنا ہماری اولین ترجیح ہے اور ہم طویل مدتی مثبت نتائج کو یقینی بنانے کے لیے اس کے لیے پرعزم ہیں، ان کوششوں کو نہ صرف ملکی مبصرین بلکہ معروف بین الاقوامی مالیاتی اداروں نے بھی تسلیم کیا ہے۔

موجودہ بجٹ پر انہوں نے کہا کہ حکومت نے بے نظیر انکم سپورٹ پروگرام (بی آئی ایس پی) کے تحت امدادی بجٹ میں توسیع کی تاکہ مستحق خاندانوں کی مدد کی جا سکے۔اس کے علاوہ نئے بجٹ میں سرکاری ملازمین کی تنخواہوں میں 10 فیصد اور ریٹائر ہونے والوں کی پنشن میں 7 فیصد اضافہ مختص کیا گیا ہے۔بلال اظہر کیانی نے مزید کہا کہ تنخواہ دار افراد پر ٹیکس کا بوجھ کم کر دیا گیا ہے۔انہوں نے کہا کہ اب ہماری توجہ اخلاص اور عزم کے ساتھ ٹیکس نیٹ کو وسعت دینے پر ہے۔انہوں نے کہا کہ ہر شعبے کو قومی آمدنی میں یکساں حصہ ڈالنا چاہیے۔