بھارت میں نریندر مودی کی قیادت میں بی جے پی حکومت نے ایک نیا، متنازع اور خطرناک رخ اختیار کر لیا

نئی دہلی (اُردو پوائنٹ اخبارتازہ ترین - آن لائن۔ 11 جون2025ء) بھارت میں نریندر مودی کی قیادت میں بی جے پی حکومت نے ایک نیا، متنازع اور خطرناک رخ اختیار کر لیا ہے۔ آسام سمیت دیگر مشرقی ریاستوں میں ہزاروں بھارتی مسلمانوں کو نیشنل رجسٹرڈ آف سٹیزنز (NRC) کی بنیاد پر غیر ملکی قرار دے کر جبراً بے دخل کیا جا رہا ہے۔ بین الاقوامی نشریاتی ادارے بی بی سی کی ایک رپورٹ نے اس سلسلے میں بھارتی پولیس، آسام بارڈر فورس اور دیگر حکومتی اداروں کی جانب سے کی جانے والی انسانی حقوق کی سنگین پامالیوں کا پردہ چاک کیا ہے۔

بی بی سی کے مطابق آسام میں متعدد شہریوں کو بغیر کسی قانونی وضاحت اور ثبوت کے، زبردستی بنگلہ دیشی مہاجر قرار دے کر سرحد پار دھکیل دیا گیا۔ ان بے دخل کیے گئے افراد میں بھارتی شہری شونا بانو سمیت درجنوں مسلمان شامل ہیں، جنہیں بندوق کے زور پر ملک چھوڑنے پر مجبور کیا گیا۔

(جاری ہے)

متاثرہ افراد نے بتایا کہ انہیں کئی دن کھلے آسمان تلے، بھوک، پیاس اور کیڑوں کے درمیان زندگی گزارنے پر مجبور کیا گیا۔

نہ کوئی عدالتی سماعت، نہ قانونی کارروائی ، صرف ایک ظالمانہ نظام، جو اپنی ہی شہریت رکھنے والے افراد کو بے گھر کر رہا ہے۔بنگلہ دیشی حکام کے مطابق صرف مئی 2025 میں 1200 سے زائد افراد کو بھارت نے غیر قانونی طور پر بے دخل کیا، جن میں سے 100 افراد کی بھارتی شہریت کی تصدیق کے بعد انہیں واپس بھیج دیا گیا۔NRC کی جاری کردہ فہرست کے مطابق آسام میں دو لاکھ سے زائد افراد کو بھارتی شہریت سے محروم کر کے غیر ملکی قرار دے دیا گیا ہے، جن میں اکثریت مسلمانوں کی ہے۔

متعدد شہریوں کے مقدمات عدالتوں میں زیر سماعت ہیں، لیکن اس کے باوجود انہیں زبردستی سرحد پار بھیجا جا رہا ہے۔آسام کی مسلمان آبادی شدید خوف و ہراس کا شکار ہے۔ شہریوں کو ہر وقت جبری گرفتاری، حراست اور ملک بدری کے خطرے کا سامنا ہے۔ماہرین قانون اور انسانی حقوق کی تنظیموں نے اس پالیسی کو غیر انسانی، غیر قانونی اور آئینی حقوق کی صریح خلاف ورزی قرار دیا ہے۔

ان کا کہنا ہے کہ مودی حکومت عدالتی احکامات کو توڑ مروڑ کر اپنے سیاسی ایجنڈے کے لیے استعمال کر رہی ہے، جس کے نتیجے میں ہزاروں بے گناہ افراد جلاوطنی، حراست اور بنیادی حقوق کی پامالی کا شکار ہو چکے ہیں۔بی بی سی کی اس رپورٹ نے نہ صرف بھارت کے اندر بلکہ عالمی سطح پر بھی ایک نئی بحث چھیڑ دی ہے کہ کیا دنیا کی سب سے بڑی جمہوریت واقعی اقلیتوں کے لیے محفوظ ہی اور اگر نہیں، تو عالمی ضمیر کب جاگے گا