Live Updates

بچے قوم کا روشن مستقبل ہیں اور جبری مشقت کا خاتمہ ہم سب کی مشترکہ قومی ذمہ داری ہے، یوسف رضا گیلانی

بچوں سے مشقت لینا معاشرتی ناسور اور ناقابلِ معافی جرم ہے جس کے خلاف مؤثر اقدامات ناگزیر ہیں، چیئر مین سینٹ کا بیان

جمعرات 12 جون 2025 20:27

بچے قوم کا روشن مستقبل ہیں اور جبری مشقت کا خاتمہ ہم سب کی مشترکہ قومی ..

اسلام آباد (اُردو پوائنٹ اخبارتازہ ترین - این این آئی۔ 12 جون2025ء)چیئرمین سینیٹ سید یوسف رضا گیلانی نے کہا ہے کہ بچے قوم کا روشن مستقبل ہیں اور جبری مشقت کا خاتمہ ہم سب کی مشترکہ قومی ذمہ داری ہے۔ چائلڈ لیبر ڈے کے موقع پر اپنے خصوصی پیغام میں انہوں نے کہا کہ بچوں سے مشقت لینا معاشرتی ناسور اور ناقابلِ معافی جرم ہے جس کے خلاف مؤثر اقدامات ناگزیر ہیں۔

چیئرمین سینیٹ نے اپنے پیغام میں کہا کہ چائلڈ لیبر بچوں کے محفوظ مستقبل میں سب سے بڑی رکاوٹ ہے اور اس کا مکمل خاتمہ وقت کی اہم ترین ضرورت ہے۔سید یوسف رضا گیلانی نے کہا کہ آئینِ پاکستان حقوق کے تحفظ اور بہتر معیارِ زندگی کی مکمل ضمانت فراہم کرتا ہے اور ہر بچے کا یہ بنیادی حق ہے کہ اسے تعلیم، تحفظ، کھیل اور صحت مند زندگی میسر ہو۔

(جاری ہے)

انہوں نے کہا کہ بچوں کو جبری مشقت سے محفوظ، تعلیم دوست اور پرامن ماحول فراہم کرنا ہم سب کا فرض ہے اور اس مقصد کے حصول کے لیے ہر سطح پر سنجیدہ اقدامات کیے جانے چاہئیں۔

چیئرمین سینیٹ نے کہا کہ پارلیمان بچوں کے بنیادی حقوق کے تحفظ کے لیے مؤثر قانون سازی اور اقدامات کے لیے پٴْرعزم ہے۔ انہوں نے کہا کہ سینیٹ آف پاکستان بچوں کے حقوق کے تحفظ اور انہیں مشقت سے بچانے کے لیے ہر ممکن اقدامات کر رہا ہے تاکہ وہ ایک محفوظ، تعلیم یافتہ اور خوشحال زندگی گزار سکیں۔ سید یوسف رضا گیلانی نے کہا کہ پارلیمان بچوں کے حقوق کے تحفظ کے لیے قانون سازی اور دیگر اقدامات عمل میں لا رہی ہے تاکہ معاشرے میں چائلڈ لیبر کے ناسور کا مکمل خاتمہ ممکن بنایا جا سکے۔

چیئرمین سینیٹ نے کہا کہ چائلڈ لیبر کے مکمل خاتمے کے لیے میڈیا، سول سوسائٹی اور عوام کا یکجا ہونا ناگزیر ہے۔ انہوں نے کہا کہ ہم سب کو بطور قوم یہ عہد کرنا ہو گا کہ ہر بچے کو تعلیم، تحفظ اور بہتر زندگی کے مواقع فراہم کرنے کے لیے اپنی اجتماعی اور انفرادی ذمہ داری پوری کریں گے تاکہ پاکستان کو ایک روشن، محفوظ اور ترقی یافتہ مستقبل کی جانب گامزن کیا جا سکے۔