Live Updates

منشیات کے خلاف کمشنر پشاور ڈویژن کی کوششیں قابلِ تحسین ہیں، صدر پاکستان بزنس فورم

ہفتہ 14 جون 2025 16:33

پشاور (اُردو پوائنٹ اخبارتازہ ترین - اے پی پی۔ 14 جون2025ء) صدر پاکستان بزنس فورم پشاور سٹی شہزاد احمد نے کمشنر پشاور ریاض محسود کو خراج تحسین پیش کرتے ہوئے کہا ہے کہ انہوں نے ذاتی دلچسپی لے کر پشاور کو منشیات سے پاک کرنے کی جو مہم شروع کی ہے وہ قابلِ تعریف اور پورے ملک کے لیے ایک مثال ہے۔ فورم کی جانب سے جاری بیان میں شہزاد احمد نے کہا کہ کمشنر پشاور کی قیادت میں نشے کے عادی افراد کے خلاف جو موثر کارروائیاں ہو رہی ہیں، وہ ہمارے معاشرے کے نوجوانوں کو ایک محفوظ مستقبل دینے کی طرف اہم قدم ہیں۔

انہوں نے کہا کہ جب کوئی ایماندار افسر منشیات کے خلاف عملی اقدامات اٹھاتا ہے، تو بدقسمتی سے منشیات فروش اپنے ہمدردوں کے ذریعے اس کی کردار کشی کی کوشش کرتے ہیں تاکہ اس کی مہم کو سبوتاژ کیا جا سکے۔

(جاری ہے)

شہزاد احمد نے اعلان کیا کہ پاکستان بزنس فورم کمشنر پشاور کے ہر مثبت قدم کی مکمل حمایت کرتا ہے اور منشیات کے خلاف اس مہم کا حصہ بنے گا۔ انہوں نے کہا کہ یہ مہم صرف سرکاری نہیں بلکہ عوامی ہونی چاہیے تاکہ ہر شہری اس میں اپنا کردار ادا کرے۔

انہوں نے کمشنر پشاور سے اپیل کی کہ اس مہم کو مزید موثر بنانے کے لیے اسے گھروں اور محلوں تک توسیع دی جائے تاکہ آئس جیسے مہلک نشے میں مبتلا نوجوانوں کا جلد از جلد علاج ممکن ہو۔ انہوں نے تجویز دی کہ مقامی پولیس تھانوں کو ہدایات دی جائیں کہ وہ آئس کے نشے میں مبتلا نوجوانوں کی شناخت کر کے ان کو بحالی مراکز تک پہنچائیں۔ عوام کو سہولت دی جائے کہ اگر ان کے گھروں میں کوئی فرد آئس جیسے نشے میں مبتلا ہے تو وہ بلا خوف پولیس سے رابطہ کریں تاکہ ایسے افراد کو علاج کی سہولت دی جا سکے، اس مہم کےلیے ایک ہیلپ لائن اور عوامی آگاہی مہم بھی شروع کی جائے تاکہ لوگ اعتماد کے ساتھ اپنا کردار ادا کریں۔

شہزاد احمد نے کہا کہ چونکہ یہ مہم براہ راست عوامی مسائل سے جڑی ہوئی ہے اس لیے ہمیں یقین ہے کہ یہ گزشتہ مہمات کی طرح کامیاب ہوگی۔ انہوں نے پشاور کے شہریوں سے بھی اپیل کی کہ وہ منشیات کے خاتمے کے لیے کردار ادا کریں اور نشے کے خلاف جاری اس جہاد میں حکومت اور انتظامیہ کا ساتھ دیں۔