ایران کا ایٹمی ہتھیار بنانے کا کوئی ارادہ نہیں، ہمیں جوہری توانائی اور تحقیق کا حق حاصل ہے، مسعود پزشکیان

تہران(اردوپوائنٹ اخبار تازہ ترین۔16جون 2025)ایرانی صدرمسعود یزشکیان کا کہنا ہے کہ ایران کا ایٹمی ہتھیار بنانے کا کوئی ارادہ نہیں،ایران جوہری توانائی اور تحقیق کے اپنے حق کا بھرپور انداز میں دفاع کرے گا، ایٹمی ہتھیاروں کا حصول ہمارا مقصد نہیں ہے،پرامن مقاصد کیلئے یورینیم کی افزودگی جاری رکھیں گے،خبر رساں اداروں اے ایف پی اور رائٹرز کے مطابق ایران کے صدر مسعود پزشکیان نے پارلیمنٹ سے خطاب کرتے ہوئے قوم سے اپیل کی ہے کہ ہر اختلاف، مسئلے اور رکاوٹ کو آج پس پشت ڈال دینا چاہیے اور ہمیں اس نسل کش مجرمانہ جارحیت کے خلاف اتحاد اور یکجہتی کے ساتھ مضبوطی سے کھڑا ہونا ہوگا۔

ایرانی صدر نے یہ بات ایران کے سپریم لیڈر آیت اللہ علی خامنہ ای کے اس مذہبی فتوے کو دہراتے ہوئے کہی جس میں وسیع پیمانے پر تباہی پھیلانے والے ہتھیاروں کی ممانعت کی گئی ہے۔

(جاری ہے)

ہمیں جوہری توانائی اور تحقیق کا حق حاصل ہے اور کوئی ہم سے یہ حق نہیں چھین سکتا۔ عوام سے کہتا ہوں صیہونی ریاست نے جنگ مسلط کردی ہے۔بحران کے دوران صبر سے کام لیں،ہم کسی پرغلبہ نہیں چاہتے،جارحیت کرنیوالوں میں سے نہیں ہیں۔

انہوں نے کہا کہ اسرائیل ایک ایک کرکے مسلمان ملکوں کو نشانہ بنارہا ہے۔اسرائیل کے ساتھ کھڑا ہونا امریکی غندہ گردی ہے۔اسرائیل طاقت کے زور سے ہمیں مٹا نہیں سکتا،ایک شہید ہوگا تو اس کی جگہ لینے کیلئے سو کھڑے ہونگے۔ ایران کا ایٹمی ہتھیار بنانے کا کوئی ارادہ نہیں، تاہم وہ جوہری توانائی اور تحقیق کے اپنے حق کا بھرپور انداز میں دفاع کرے گا۔

خیال رہے کہ اس سے قبل بھی ایران کے رہبر انقلاب آیت اللہ سید علی خامنہ ای نے صیہونی فضائیہ کے حملوں پر اپنا ردعمل دیتے ہوئے کہا تھاکہ اسرائیل نے اپنے تلخ اور دردناک تقدیر کی بنیاد رکھ دی تھی۔اسرائیل کو حملے کی سخت سزا ملے گی۔ایرانی سپریم لیڈر نے سماجی رابطے کی ویب سائٹ ایکس پر بیان جاری کرتے ہوئے کہا تھاکہ آج صبح صہیونی ریاست نے ہماری سرزمین پر شیطانی اور خون آلود ہاتھوں سے ایک سنگین جرم کا ارتکاب کیاتھا۔

دشمن نے رہائشی علاقوں کو نشانہ بنا کر اپنی فطرت کو پہلے سے زیادہ بے نقاب کر دیاتھا۔انہوں نے کہا تھا کہ اسرائیل کے ہاتھ خون سے رنگے ہوئے تھے۔اللہ نے چاہا تو ایران کی مسلح افواج کے مضبوط بازو اسرائیل کو سزا دیئے بغیر نہیں رکیں گے۔آیت اللّٰہ خامنہ ای نے تصدیق کی تھی کہ اسرائیل کے حملے میں کئی کمانڈر اور سائنسدان شہید ہوئے تھے۔ ان کمانڈرز اور سائنس دانوں کے جانشین اپنے فرائض انجام دے کر مشن جاری رکھیں گے۔

ایرانی سپریم لیڈر نے مزید کہا تھا کہ اسرائیل نے اپنے لیے تلخ اور تکلیف دہ قسمت کا انتخاب کیا ہے اور اس میں شک ہی نہیں کہ اسے یہ سزا ضرور ملے گی۔سپریم لیڈر نے کہا کہ اسرائیل سزا کیلئے تیار رہے۔ ایران کی مسلح افواج دشمن کے اس حملے کا جواب دیں گی۔صہیونی حکومت نے اپنے خون آلود ہاتھوں سے ہمارے عزیز وطن میں جرم کا ارتکاب کیاتھا اور رہائشی علاقوں کو نشانہ بنا کر اپنی شیطانی فطرت کو مزید آشکار کر دیاتھا۔رہبر انقلاب نے اپنے بیان میں زور دیتے ہوئے یہ بھی کہا تھاکہ اسرائیلی حکومت کو ایک سخت جواب کا انتظار کرنا چاہیے تھا۔