پشاور بی آر ٹی‘ کرایوں میں اضافے کا حتمی فیصلہ، مالی خسارہ برقرار

سرکاری دستاویزات کے مطابق بی آر ٹی کے کرایے میں فی سٹاپ 10 روپے کا اضافہ کیا جا رہا ہے

پیر 16 جون 2025 13:22

پشاور(اُردو پوائنٹ اخبارتازہ ترین - این این آئی۔ 16 جون2025ء) خیبرپختونخوا حکومت نے بی آر ٹی (بس ریپڈ ٹرانزٹ) کے مسلسل بڑھتے ہوئے مالی خسارے کے پیش نظر کرایوں میں اضافے کا حتمی فیصلہ کر لیا۔خیبرپختونخوا اربن موبیلیٹی اتھارٹی کی جانب سے جاری اعلامیہ کے مطابق کرایوں میں اضافہ یکم جولائی 2025 سے نافذ العمل ہوگا۔سرکاری دستاویزات کے مطابق بی آر ٹی کے کرایے میں فی سٹاپ 10 روپے کا اضافہ کیا جا رہا ہے، پانچ کلومیٹر تک کا سفر کرنے والے مسافروں سے اب 30 روپے وصول کیے جائیں گے جو پہلے 20 روپے تھا۔

اسی طرح 40 کلومیٹر تک کے سفر پر کرایہ 60 روپے سے بڑھا کر 70 روپے کر دیا گیا ہے جبکہ ایک بار ٹکٹ کی قیمت بھی 60 سے بڑھا کر 70 روپے کر دی گئی ہے۔یہ فیصلہ ٹرانس پشاور کے بورڈ آف گورنرز کی حالیہ میٹنگ میں کیا گیا جس میں بی آر ٹی کے جاری مالی بحران پر تفصیلی غور کیا گیا۔

(جاری ہے)

دستاویزات کے مطابق حکومت نے گزشتہ برس بی آر ٹی کو 4 ارب روپے کی سبسڈی دی تاہم اس کے باوجود مالی خسارے میں نمایاں کمی نہ آ سکی۔

محکمہ ٹرانسپورٹ کے حکام کا کہنا ہے کہ مہنگائی کے موجودہ حالات میں کرایے میں 10 روپے اضافہ کوئی بڑا بوجھ نہیں اور اس اقدام کا مقصد بی آر ٹی منصوبے کو خسارے سے نکال کر خود کفالت کی جانب گامزن کرنا ہے۔اعلامیہ کے مطابق یومیہ 6 لاکھ مسافروں کی موجودگی میں ٹرانس پشاور کو کرایوں میں اضافے کے بعد 60 لاکھ روپے یومیہ آمدن حاصل ہو سکے گی جو کہ بی آر ٹی کی مالی صورتحال کو مستحکم کرنے میں مددگار ثابت ہو گی۔