بٹگرام سے تعلق رکھنے والا باصلاحیت اور پرعزم نوجوان سعید فراز طلبہ کیلئے مثالی شخصیت بن گیا

پیر 16 جون 2025 13:43

بٹگرام (اُردو پوائنٹ اخبارتازہ ترین - اے پی پی۔ 16 جون2025ء) ضلع بٹگرام سے تعلق رکھنے والا باصلاحیت، پرعزم اور باوقار نوجوان سعید فراز اپنے علم اور کردار کی بدولت نہ صرف اپنے ضلع بلکہ پاکستان کے طلبہ کیلئے ایک مثالی شخصیت بن چکا ہے۔ سعید فراز نے پاکستان اسلامک ریسرچ سٹوڈنٹس ایسوسی ایشن (پیرسا) جیسی موثر طلبہ تنظیم کی بنیاد رکھی جس کا مقصد ملک بھر سے تعلق رکھنے والے طلباءکو علمی، سماجی اور اخلاقی میدان میں رہنمائی فراہم کرنا ہے۔

سعید فراز نے یہاں صحافیوں سے بات چیت کرتے ہوئے بتایا کہ طلبہ کے مسائل کے حل، ان کے حقوق کی پاسداری اور ان کی علمی ترقی کیلئے وہ ہر فورم پر بھرپور کردار ادا کر رہے ہیں، ان کی انتھک محنت، خلوص اور جذبہ نے طلبہ کے دلوں میں اعتماد اور احترام پیدا کیا ہے اور دن بدن ان پر اعتماد بڑھتا جا رہا ہے۔

(جاری ہے)

سعید فراز نے چند روز قبل اسلام آباد میں منعقدہ ایک سیمینار کے دوران ضلع کے نمائندہ کے طور پر شرکت کی۔

تقریب میں ان کی زبردست کارکردگی اور فکری قیادت کو سراہتے ہوئے ملک کی معروف اور نامور اسلامی شخصیات نے انہیں تعریفی اسناد سے نوازا جو ان کے کردار اور خدمات کا برملا اعتراف ہے۔ بلاشبہ سعید فراز بٹگرام کا فخر ہے جس پر نہ صرف ان کے علاقہ بلکہ پورے پاکستان کے طلباءکو ناز ہے، ان کی قیادت، محنت اور اخلاص نوجوان نسل کیلئے مشعل راہ ہے۔