Live Updates

ملک کے کاشتکار کو وسائل فراہم کرنے کی ضرورت ہے، خورشید احمد جونیجو

پیر 16 جون 2025 13:43

اسلام آباد (اُردو پوائنٹ اخبارتازہ ترین - اے پی پی۔ 16 جون2025ء) پاکستان پیپلز پارٹی کے رکن قومی اسمبلی خورشید احمد جونیجو نے کہا ہے کہ ملک کے کاشتکار کو وسائل فراہم کرنے کی ضرورت ہے، گندم کی فصل پر فی ایکڑ خرچہ 55 سے 60 ہزار ہے اگر صورتحال یہی رہی تو آئندہ ملک میں گندم کا بحران آئے گا، ملک کو زرعی اجناس میں خود کفیل بنانے کی ضرورت ہے جس کیلئے زراعت کے شعبے کو وسائل فراہم کئے جائیں۔

پیر کو قومی اسمبلی میں بجٹ پر بحث میں سے حصہ لیتے ہوئے انہوں نے کہا کہ وزیر خزانہ نے اپنی بجٹ سپیچ میں کہا ہے کہ ملک اقتصادی لحاظ سے مستحکم ہو رہا ہے، زرمبادلہ کے ذخائر بڑھ رہے ہیں، وزیر خزانہ کا کہنا تھا کہ عالمی اداروں نے بھی کہہ دیا ہے کہ ملک کی معیشت کی سمت درست ہے تاہم انہوں نے کہا کہ یہ اعداد و شمار جو وزیر خزانہ نے پیش کیے ہیں یہ ملک کے زمینی حقائق سے مطابقت نہیں رکھتے۔

(جاری ہے)

انہوں نے کہا کہ وزیر خزانہ نے اپنی بجٹ تقریر میں ٹیکس اقدامات تو تجویز کر دیئے ہیں لیکن یہ نہیں بتایا کہ یہ ٹیکس کیسے وصول کریں گے۔ انہوں نے کہا کہ ملک میں 3.3 ٹریلین کی سمگلنگ اشیاء آتی ہیں جو ٹیکس نیٹ سے باہر ہیں جس کی وجہ سے مسائل ہیں۔ انہوں نے کہا کہ گندم کی فصل پر 55 سے 60 ہزار فی ایکڑ خرچہ آتا ہے ان حالات میں کاشتکار کا خرچہ بھی پورا نہیں ہوتا، آئندہ گندم کی فصل متاثر ہوگی۔

انہوں نے تجویز دی کہ ہمیں اپنے کاشتکار کو مضبوط کرنا ہے تاکہ ہم گندم سمیت دیگر زرعی اجناس میں ملک کو خود کفیل بنا سکیں۔ انہوں نے کہا کہ سکھر سے حیدرآباد تک ایم 6 موٹروے منصوبہ 306 کلومیٹر کا ہے یہ منصوبہ جلد از جلد مکمل کیا جائے۔ انہوں نے مطالبہ کیا کہ آر بی او ڈی منصوبے کی بقایا آٹھ ارب سے زائد رقم واپڈا سے سندھ حکومت کو منتقل کرائی جائے۔ انہوں نے مطالبہ کیا کہ سندھ کے گیس اور بجلی کے مسائل بہت زیادہ ہیں جنہیں حل کرنے کی ضرورت ہے۔