بلوچستان ،مالی سال 2025-26 ،بجٹ میں محکمہ ا مور حیوانات و مویشیات ،ڈیری ترقی کیلئے 1 ارب 26کروڑ روپے مختص

کوئٹہ (اُردو پوائنٹ اخبارتازہ ترین - این این آئی۔ 17 جون2025ء)بلوچستان کے آئندہ مالی سال 2025-26 کے بجٹ میں محکمہ ا مور حیوانات و مویشیات اور ڈیری ترقی کیلئے مجموعی طور پر 1 ارب 26کروڑ روپے مختص کئے گئے ہیں ۔ منگل کو بلوچستان اسمبلی کے اجلاس میں صوبائی وزیر خزانہ میر شعیب نوشیروانی نے آئندہ مالی سال کا بجٹ پیش کرتے ہوئے کہا کہ بلوچستان کی زیادہ تر آبادی کا تعلق بالواسطہ یا بلا واسطہ لائیو اسٹاک سے منسلک ہے۔

مال مویشی کسی بھی معاشرے کی اقتصادی ترقی میں اہم کردار ادا کرتے ہیں اور ان سے حاصل ہونے والے گوشت، دودھ اور انڈوں کے ذریعے عوام کو نہ صرف پروٹین بلکہ غذائیت و خوراک بھی پوری ہوتی ہے۔ صوبہ بلوچستان مال مویشی کی دولت سے مالا مال صوبہ ہے جو پاکستان کی 40 فیصد آبادی کی ضروریات کو پورا کرتی ہے۔

(جاری ہے)

یہ شعبہ محض خوراک یا آمدنی کا ذریعہ نہیں بلکہ ہمارے دیہی معاشرے کا سہارا، معاشی پائیداری کا ستون اور ہماری مجموعی ترقی کی گنجی ہے۔

ہمارا صوبہ بلوچستان قدرتی وسائل سے مالا مال ہے اور لائیو اسٹاک کی پیداوار کے لئے ایک وسیع صلاحیت کا درجہ رکھتا ہے یہ شعبہ صوبے کی معیشت کی ریڑھ کی ہڈی ہے جو نہ صرف صوبائی جی ڈی پی میں نمایاں حصہ ڈالتا ہے بلکہ لاکھوں لوگوں کے روزگار کا ذریعہ بھی ہے۔ غرض یہ شعبہ جی ڈی پی میں 14 فیصد حصہ اور زراعت میں 64 فیصد حصہ رکھتا ہے۔ انہوں نے کہا کہ اس سال کمرشل پولٹری میں بھی نمایاں اضافہ ہوا ہے اور کنٹرول شیڈ بریلر فارمنگ لاکھوں افراد کے لئے روزگار کا ذریعہ بنی ہوئی ہے جو کہ فارمنگ ، مارکیٹنگ اور فاسٹ فوڈ کی سپلائی سے وابستہ ہیں۔

ی بلوچستان میں وسیع و عریض چرا گا ہیں ہیں اور یہ مال مویشی پالنے کے لئے موزوں ہے، جاری مالی سال 2024-25 میں بھیڑ بکریوں کی تعداد 1.768 کروڑ سے 87.1 کروڑ بکریوں تک پہنچ چکی ہے جو دیہی معیشت کی معاونت ، خوارک کی سلامتی، روزگار کے مواقع اور قدرتی وسائل کا مئوثر استعمال میں اہم کردار ادار کر رہا ہے۔ اسی طرح صوبے میں جانوروں کے وبائی امراض کی رپورٹنگ و نگرانی ، جانوروں کی افزائش نسل اور جانوروں کی بیماریوں کی تشخیص کے نظام کو مزید مضبوط کیا جارہا ہے۔

مالی جاری سال 25-2024 میں محکمہ لائیو اسٹاک نے 51 ترقیاتی اسکیمیں منظور کیں جن کے لئے 714.42 ملین روپے فراہم کیے گئے جن میں سے 46 جاری اسکیمیں اور 5 نئی اسکیمیں شامل ہیں۔ انہوں نے کہا کہ آئندہ مالی سال 26-2025 میں اس شعبے کی ترقی کے لیے ترقیاتی مد میں 1.2 ارب روپے اور غیر ترقیاتی مد 6 کروڑ 66لاکھ روپے مختص کیے گئے ہیں۔