Live Updates

اقوام متحدہ ذمہ داری نبھانے میں ناکام، مغربی ممالک کی دوہری پالیسی ہے، ایرانی مندوب

تہران اپنی خودمختاری، علاقائی سالمیت اور اپنے عوام کے دفاع میں ہرگز ہچکچاہٹ سے کام نہیں لے گا،امیر سعید ایراوانی

بدھ 18 جون 2025 19:49

نیو یارک (اُردو پوائنٹ اخبارتازہ ترین - این این آئی۔ 18 جون2025ء)اقوام متحدہ میں ایرانی سفیر و مستقل مندوب نے کہا ہے کہ جنگ کی ابتداء ایران نے نہیں ،اسرائیلی حکومت نے امریکہ سے گرین سگنل ملنے کے بعد شروع کی ۔ایرانی میڈیا کے مطابق امیر سعید ایراوانی نے مشرق وسطی، بالخصوص شام کے مسئلے پر اقوام متحدہ کی سلامتی کونسل کے اجلاس سے خطاب میں اقوام متحدہ پر جارح قوت کو روکنے میں ناکامی اور مغربی ممالک پر دوہری پالیسی کا الزام لگاتے ہوئے ایران کے خلاف اسرائیلی جارحیت کے تسلسل پر خبردار کرتے ہوئے کہا کہ تہران اپنی خودمختاری، علاقائی سالمیت اور اپنے عوام کے دفاع میں ہرگز ہچکچاہٹ سے کام نہیں لے گا۔

انہوں نے اسرائیلی جارحیت کو اقوام متحدہ کے منشور اور بین الاقوامی قانون کے بنیادی اصولوں کی کھلی خلاف ورزی قرار دیا۔

(جاری ہے)

انہوں نے کہا کہ یہ دہشت گردانہ حملے شہری بنیادی ڈھانچے اور بین الاقوامی جوہری توانائی ایجنسی کی نگرانی میں کام کرنے والی پرامن جوہری تنصیبات کو نشانہ بنا رہے ہیں، اور اگر یہ حملے جاری رہے تو ان کے تباہ کن نتائج ہو سکتے ہیں۔

امیر سعید ایراوانی نے کہا کہ ایران نے اقوام متحدہ کے منشور کے آرٹیکل 51 کے تحت اپنے جائز دفاع کے فطری حق کا استعمال کیا ہے، اور ایران کا ردعمل مکمل طور پر دفاعی، محدود اور متناسب تھا، جو صرف فوجی اور اقتصادی اہداف تک محدود تھا۔انہوں نے اسرائیل کے دفاع کے دعوے کو مسترد کرتے ہوئے کہا کہ اگر اس بیانیے کو معمول بنا لیا گیا تو یہ اقوام متحدہ کے منشور کے ایک بنیادی اصول (بین الاقوامی تعلقات میں طاقت کے استعمال یا دھمکی کی ممانعت)کو کمزور کر دے گا۔

ایراوانی نے کہا کہ غزہ، لبنان، شام اور یمن کا تلخ تجربہ ایک بار پھر یہ ظاہر کرتا ہے کہ اقوام متحدہ کی سلامتی کونسل اپنی سب سے بنیادی ذمہ داریوں کو نبھانے میں ناکام رہی ہے، اور جارح قوتوں کو روکنے میں مکمل ناکامی کا شکار ہے۔انہوں نے امریکا، برطانیہ اور فرانس سمیت بعض مغربی ممالک کی دوہری پالیسیوں پر بھی شدید تنقید کی۔