چوہدری شافع حسین کی زیرصدارت پنجاب بورڈ آف ٹیکنیکل ایجوکیشن کا اجلاس،20 نکاتی ایجنڈے کا جائزہ لیا گیا

امتحانی نظام کو مزید شفاف بنانے کیلئے مانیٹرنگ کا مؤثر نظام وضع کیا جائے،پنجاب بورڈ آف ٹیکنیکل ایجوکیشن کے زیر اہتمام ہونے والے امتحانات کی آن لائن مانیٹرنگ کیلئے کنٹرول روم بنایا جائے نوجوانوں کو جدید علوم سے آراستہ کرکے ہی ملک وقوم کی تقدیر بدلی جاسکتی ہے‘صوبائی وزیرصنعت و تجارت

جمعرات 19 جون 2025 16:43

چوہدری شافع حسین کی زیرصدارت پنجاب بورڈ آف ٹیکنیکل ایجوکیشن کا اجلاس،20 ..

لاہور (اُردو پوائنٹ اخبارتازہ ترین - این این آئی۔ 19 جون2025ء)صوبائی وزیر صنعت و تجارت چوہدری شافع حسین نے پنجاب سکلز ڈویلپمنٹ اتھارٹی کا دورہ کیاجہاں پنجاب بورڈ آف ٹیکنیکل ایجوکیشن کے اجلاس کی صدارت کی۔اجلاس میں 20 نکاتی ایجنڈے کا جائزہ لیا گیا۔بورڈ کی ورکنگ میں مزید بہتری لانے کیلئے متعدد امور کی منظوری دی گئی۔بورڈ نے اسیسمنٹ اور سرٹیفیکیشن سسٹم کی ڈیجیٹائزیشن اور رقوم کی زیادہ منافع دینے والے بنک میں دوبار ہ سرمایہ کاری کی منظوری دی ۔

بورڈ نے ڈیلی ویجڈ سٹاف کی اجرت کی شرح بڑھانے اور بورڈ ممبران کی اجلاس میں شرکت کا اعزازیہ 15ہزار سے بڑھا کر 25 ہزار کرنے کی بھی منظوری دی۔بورڈ نے بعض دیگر مالی و انتظامی امور کی بھی منظوری دی۔بورڈ نے فنی تعلیم کے بعض اداروں کی رجسٹریشن فیس،طلبا کی امتحانی فیس،جرمانوں کی معافی اور دیگر معاملات کی بھی منظوری دی۔

(جاری ہے)

صوبائی وزیر صنعت و تجارت چوہدری شافع حسین نے اس موقع پر گفتگوکرتے ہوئے کہاکہ امتحانی نظام کو مزید شفاف بنانے کیلئے مانیٹرنگ کا مؤثر نظام وضع کیا جائے۔

پنجاب بورڈ آف ٹیکنیکل ایجوکیشن کے زیر اہتمام ہونے والے امتحانات کی آن لائن مانیٹرنگ کیلئے کنٹرول روم بنایا جائے۔ فنی تعلیم کے اداروں کی لیبز اور کورسز کی اپ گریڈیشن سے طلباء کی تعداد بڑھائی جاسکتی ہے۔چوہدری شافع حسین نے کہاکہ پاکستان کا مستقبل معیاری فنی تعلیم کے فروغ سے جڑا ہے۔نوجوانوں کو جدید علوم سے آراستہ کرکے ہی ملک وقوم کی تقدیر بدلی جاسکتی ہے۔

مارکیٹ کی ضروریات کے مطابق ہنرمند افرادی قوت کی تیاری وقت کی ضرورت ہے۔صوبائی وزیر چوہدری شافع حسین نے مالیاتی امور میں شفافیت کو یقینی بنانے کیلئے آڈٹ کمیٹی بنانے کی ہدایت کی۔صوبائی وزیر نے بورڈ کی ورکنگ بہتر بنانے کیلئے جامع تجاویز بھی طلب کیں۔چیئرپرسن پنجاب بورڈ آف ٹیکنیکل ایجوکیشن سارہ رشید نے بورڈ کی ورکنگ اور دیگر امور بارے تفصیلی بریفنگ دیتے ہوئے کہاکہ پنجاب بورڈ آف ٹیکنیکل ایجوکیشن کے زیر اہتمام ہرسال ایک لاکھ سے زائد طلبہ امتحانات میں شریک ہوتے ہیں۔ اجلاس میں بورڈ ممبران نے شرکت کی۔