چینی کے ذخیرہ اندوزوں اور سٹے بازوں کیخلاف کارروائی کا فیصلہ، وزیراعظم نے کریک ڈاؤن کی منظوری دیدی

آئی بی ، ایف بی آر اور سٹیٹ بینک سمیت دیگر متعلقہ اداروں کو مکمل اختیارات دے دئیے گئے، کارروائیوں کے دوران ذخیرہ اندوزی میں ملوث عناصرکے خلاف چھاپے، گرفتاریاں اور دیگر سخت اقدامات شامل ہوں گے

فیصل علوی جمعرات 19 جون 2025 16:35

اسلام آباد(اردوپوائنٹ اخبار تازہ ترین۔19جون 2025)چینی کے ذخیرہ اندوزوں اور سٹے بازوں کیخلاف کارروائی کا فیصلہ، وزیراعظم نے کریک ڈاؤن کی منظوری دیدی، ایف آئی اے، آئی بی، ایف بی آر اور سٹیٹ بینک سمیت دیگر متعلقہ اداروں کو مکمل اختیارات دے دئیے گئے، حکومت نے چینی کے سٹے بازوں اور ذخیرہ اندوزوں کے خلاف سخت کارروائی کا فیصلہ کرلیا۔ وزیراعظم شہباز شریف نے ذخیرہ اندوزوں، قیمتوں میں مصنوعی اضافے اور کارٹلائزیشن میں ملوث عناصرکیخلاف بلاتفریق کارروائی کی ہدایت کی ہے۔

سٹے بازوں اور ذخیرہ اندزوں کیخلاف کارروائیوں کے دوران ذخیرہ اندوزی میں ملوث عناصرکے خلاف چھاپے، گرفتاریاں اور دیگر سخت اقدامات شامل ہوں گے۔ ذرائع نے بتایا کہ یہ فیصلہ چینی کی قیمت میں غیرمعمولی اضافے کے بعد کیا گیا ہے۔

(جاری ہے)

وزیراعظم کی ہدایات کے بعد متعلقہ اداروں نے کارروائیاں تیز کردیں، آئندہ دنوں میں بڑے پیمانے پر ایکشن متوقع ہے۔

دریں اثناء وزیراعظم محمد شہباز شریف نے جناح میڈیکل کمپلیکس اینڈ ریسرچ منصوبے کی تعمیر کے تمام مراحل میں 100 فیصد شفافیت یقینی بنانے کی ہدایت کر دی۔ وزیراعظم شہباز شریف کی زیر صدارت جناح میڈیکل کمپلیکس اینڈ ریسرچ سینٹر سے متعلق ایک اعلیٰ سطح جائزہ اجلاس ہوا۔اجلاس میں جناح میڈیکل کمپلیکس اینڈ ریسرچ سینٹر کی تعمیر میں پیش رفت پر بریفنگ بھی دی گئی جس میں بتایا گیا کہ جناح میڈیکل کمپلیکس کی تعمیر سے متعلق دو کانفرنسز کا انعقاد بھی کیا گیا۔

کانفرنسوں میں 10 ممالک کی 33 کمپنیوں نے شرکت کی۔دوران اجلاس بریفنگ میں کہا گیا کہ جناح میڈیکل کمپلیکس کی تعمیر کیلئے 600 کنال اراضی لینے کا عمل تیزی سے جاری ہے، ماہرین اور کنسلٹنٹس کی تعیناتی کیلئے بین الاقوامی سطح پر اشتہار دیا جا چکا ہے۔ بریفنگ کے دوران بتایا گیا کہ جناح میڈیکل کمپلیکس سے متعلق چین، ترکیے، جنوبی کوریا اور سنگاپور میں روڈ شوز کئے گئے، روڈ شوز میں عالمی شہرت یافتہ کمپنیوں نے جناح میڈیکل کمپلیکس میں گہری دلچسپی کا اظہار کیا۔وزیراعظم شہباز شریف نے اجلاس سے خطاب میں کہا کہ جناح میڈیکل کمپلیکس پورے خطے کیلئے بہترین ہسپتال ہوگاجو جدید ترین طبی تحقیق کیلئے آلات سے لیس ہسپتال ہوگا۔