یونیورسٹی آف سرگودھا نے تعلیمی و تحقیقی شعبوں میں تعاون کیلئے بنگلہ دیش کی 4 جامعات کے ساتھ باہمی تعاون کے معاہدات پر دستخط کر دیئے

سرگودھا (اُردو پوائنٹ اخبارتازہ ترین - اے پی پی۔ 19 جون2025ء) یونیورسٹی آف سرگودھا نے تعلیمی و تحقیقی شعبوں میں تعاون کو فروغ دینے اور پاکستان و بنگلہ دیش کے مابین ثقافتی ہم آہنگی کو بڑھانے کے لیے بنگلہ دیش کی چار ممتاز جامعات کے ساتھ باہمی تعاون کے معاہدات پر دستخط کر دیے۔ ان معاہدوں پر دستخط یونیورسٹی آف سرگودھا کے وائس چانسلر پروفیسر ڈاکٹر قیصرعباس اور شراکت دارجامعات کے وائس چانسلرزنے کیے ،جن میں انٹرنیشنل اسلامک یونیورسٹی چٹاگانگ کے پروفیسرڈاکٹرمحمدعلی آزادی، یونیورسٹی آف ایشیا پیسفک کے پروفیسر ڈاکٹر قمرالاحسن، ڈافوڈل انٹرنیشنل یونیورسٹی کے پروفیسر ڈاکٹر ایم لُطفُ الرحمٰن اورنارتھ ساؤتھ یونیورسٹی کے پروفیسر ڈاکٹرعبدالحَنّان چوہدری شامل ہیں۔

یہ سٹریٹجک شراکت داریاں تعلیمی ترقی کے کئی شعبوں میں اشتراک کا پیش خیمہ ثابت ہوں گی، جن میں انڈرگریجویٹ اور پوسٹ گریجویٹ سطح پر طلبہ کے تبادلہ پروگرام، مشترکہ تحقیقاتی منصوبے، فیکلٹی ایکسچینج اور تدریسی و تحقیقی تعاون شامل ہیں۔

(جاری ہے)

اس کے علاوہ سائنس، ٹیکنالوجی اورانوویشن کے میدان میں مشترکہ تعلیمی و سائنسی پروگرامز کی تشکیل اور قومی و بین الاقوامی تقریبات، ورکشاپس، سیمینارز، کانفرنسز، نمائشوں اورتربیتی کورسز کا انعقاد بھی ان معاہدوں کا حصہ ہے۔

بنگلہ دیش کی ممتاز جامعات کے ساتھ باہمی تعاون کے معاہدات طے پانے کوخوش آئند قرار دیتے ہوئے۔وائس چانسلرپروفیسر ڈاکٹر قیصر عباس نے کہا کہ بین الاقوامی سطح پرایسے معاہدے عصرِ حاضر کے تعلیمی تقاضوں سے ہم آہنگ ہونے کے لیے ناگزیر ہیں۔ انہوں نے کہا کہ یہ شراکت داریاں تحقیق،علمی ترقی اور ثقافتی تبادلے کے نئے مواقع پیدا کریں گی۔انہوں نے مزید کہا کہ ایسی حکمتِ عملی پر مبنی شراکت داریاں نہ صرف ادارہ جاتی صلاحیت میں اضافہ کرتی ہیں بلکہ عالمی علمی معیشت میں مؤثر کردار ادا کرنے کا ذریعہ بھی بنتی ہیں۔

یونیورسٹی آف سرگودھا کا یہ اقدام عالمی تعلیمی نیٹ ورک میں وسعت، بین الاقوامی تعاون کے فروغ اور علمی معیار کی بہتری کے لیے اس کے پختہ عزم کا مظہر ہے۔وائس چانسلر نے مزید کہا کہ سرحدوں سے ماورا ادارہ جاتی اشتراک سے نہ صرف تحقیق کو تقویت ملے گی بلکہ عالمی چیلنجز سے نمٹنے میں مشترکہ تعلیمی و تحقیقی سرگرمیاں کلیدی کردار ادا کریں گی،یہ معاہدات کامسٹیک کے اشتراک سے طے پائے جبکہ معاہدوں پر دستخط کی تقریب میں او آئی سی کامسٹیک کی کوآرڈینیٹرجنرل پروفیسر ڈاکٹرمحمد اقبال چوہدری اور ڈائریکٹر اورک پروفیسر ڈاکٹر احمد رضا بلال بھی موجود تھے۔