وفاقی وزیر صحت نے پولیو ویکسینیشن نظام کی مضبوطی کیلئے گاوی ،پولیو اوور سائٹ بورڈ کا تعاون ناگزیر قرار دے دیا

پاکستان میں پولیو کیسز میں 99 فیصد سے زائد کمی واقع ہو چکی ہے، مصطفی کمال کا اجلاس میں اظہار خیال

جمعرات 19 جون 2025 21:10

اسلام آباد (اُردو پوائنٹ اخبارتازہ ترین - این این آئی۔ 19 جون2025ء)وفاقی وزیر صحت مصطفی کمال نے پولیو ویکسینیشن نظام کی مضبوطی کیلئے گاوی اور پولیو اوور سائٹ بورڈ کے تعاون کو ناگزیر قرار دیتے ہوئے کہا ہے کہ پاکستان میں پولیو کیسز میں 99 فیصد سے زائد کمی واقع ہو چکی ہے۔ترجمان وزارت صحت کے مطابق وفاقی وزیر صحت مصطفی کمال نے گاوی اور پولیو اوورسائٹ بورڈ کے مشترکہ اجلاس میں آن لائن شرکت کی ۔

اجلاس میں وفاقی وزیر صحت نے پاکستان کی نمائندگی کی اور انسداد پولیو اقدامات پر روشنی ڈالی ۔ وفاقی وزیر نے کہا کہ پولیو کا مکمل خاتمہ حکومت پاکستان کی اولین ترجیح ہے، وزیراعظم ذاتی طور پر انسدادِ پولیو مہم کی نگرانی کر رہے ہیں،انسدادِ پولیو پر پیش رفت کا جائزہ وزیراعظم ہر ماہ خود لیتے ہیں ۔

(جاری ہے)

وفاقی وزیر نے کہا کہ پاکستان میں پولیو کیسز میں 99 فیصد سے زائد کمی واقع ہو چکی ہے، پولیو اور ای پی آئی پروگرام کے مابین ہم آہنگی کو فروغ دیا جا رہا ہے۔

انہوں نے کہا کہ حفاظتی ٹیکہ جات کی کوریج کو مزید مؤثر اور مضبوط بنایا جا رہا ہے،زیرو ڈوز بچوں کے لیے مشترکہ حکمتِ عملی پر عمل جاری ہے۔انہوں نے کہا کہ زیرو ڈوز بچوں تک رسائی کے لیے مشترکہ حکمت عملی پر عملدرآمد جاری ہے۔انہوں نے کہا کہ مشترکہ مائیکرو پلاننگ اور نگرانی سے نتائج میں بہتری آئی، موبائل آبادی تک پہنچنے کے لیے بائیکر ٹیمیں متحرک ہیں ۔انہوں نے کہا کہ ویکسینیشن کے مربوط نظام کی مضبوطی کیلئے گاوی اور پولیو اوور سائٹ بورڈ کا تعاون ناگزیر ہے، ویکسینیٹرز کی تربیت اور ان کے تسلسل کو یقینی بنانے کے لیے اضافی وسائل درکار ہیں۔