پنجاب بار کاوکلاء پر قاتلانہ حملوں،دہشتگردی کی دفعات کے تحت مقدما ت کے اندراج پر تشویش

بروقت انصاف کی فراہمی کیلئے بنچ ،بار میں بہترین تعلقات کی راہیں ہموار کی گئی ہیں‘وائس چیئرمین عرفان صادق تارڑ

اتوار 22 جون 2025 17:15

لاہور(اُردو پوائنٹ اخبارتازہ ترین - این این آئی۔ 22 جون2025ء)پنجاب بار کونسل کے وائس چیئرمین عرفان صادق تارڑ نے کہا ہے کہ وکلاء پر قاتلانہ حملوںاور پولیس کی جانب سے دہشتگردی کی دفعات کے تحت مقدما ت کے اندراج پر سخت تشویش ہے ،اس حوالے سے مشاورت کا عمل جاری ہے اور جلد لائحہ عمل طے کیا جائے گا، پنجاب بار کونسل کی تمام کمیٹیاں مکمل فعال اور میرٹ پر کام کر رہی ہیں،جعلی وکلاء کے خلاف کریک ڈائون جاری ہے ۔

ان خیالات کا اظہارا نہوںنے مختلف اضلاع کی بارز کے نمائندہ وفود سے گفتگو کرتے ہوئے کیا ۔اس موقع پر پنجاب بار کونسل ایگزیکٹو کمیٹی کے چیئرمین فاروق ڈوگر،سیکرٹری رفاقت علی سوہل،اکائونٹ آفیسر رانا محمد عمیر،سابق وائس چیئرمینز فرحان شہزاد،کامران بشیر مغل،چودھری بابر وحید سمیت دیگر بھی موجو د تھے۔

(جاری ہے)

وائس چیئرمین عرفان صادق تارڑ نے کہا کہ وکالت کے شعبے میں جعلسازی کرنے والوں کو گرفت میں لانے کے لئے سخت نظام لایا گیا ہے اور ایسے عناصر قانون کی گرفت سے نہیں بچ سکتے۔

وکلا ء کی آسانی اور سہولت کے لیے تمام وسائل کو بروئے کار لا رہے ہیں،پہلی ترجیح میں بائیومیٹرک کے ذریعے الیکشن کے انعقاد کویقینی بنایا ،پنجاب بار کونسل کے تمام امور کو پیپر لیس کرنے جارہے ہیں ،بروقت انصاف کی فراہمی کے لیے بنچ اور بار کے درمیان بہترین تعلقات کی راہیں ہموار کی گئی ہیں۔