Live Updates

جے یو آئی کا مرکزی شوریٰ کا اجلاس 26 جون کو اسلام آباد میں طلب، ایران، اسرائیل جنگ اور امریکی مداخلت پر اہم فیصلے ہونگے

پیر 23 جون 2025 17:46

جیکب آباد (اُردو پوائنٹ اخبارتازہ ترین - این این آئی۔ 23 جون2025ء) جے یو آئی کا مرکزی شوریٰ کا اجلاس 26 جون کو اسلام آباد میں طلب، ایران، اسرائیل جنگ اور امریکی مداخلت پر اہم فیصلے ہونگے۔ تفصیلات کے مطابق جمعیت علماء اسلام کے سربراہ مولانا فضل الرحمن نے مشرق وسطیٰ کی سنگین صورتحال، ایران و اسرائیل تنازع اور خطے میں بڑھتی ہوئی امریکی مداخلت کے تناظر میں جے یو آئی کی مرکزی مجلس شوریٰ کا دو روزہ ہنگامی اور اہم اجلاس 26 اور 27 جون کو اسلام آباد میں طلب کر لیا ہے۔

جے یو آئی کے مرکزی سیکریٹری جنرل و رکن قومی اسمبلی مولانا عبدالغفور حیدری نے اجلاس کا باقاعدہ اعلان کیا ہے جب کہ اجلاس کی صدارت سربراہ جے یو آئی مولانا فضل الرحمن کریں گے۔ جے یو آئی کے مرکزی سیکریٹری اطلاعات محمد اسلم غوری نے ایک بیان میں کہا کہ یہ اجلاس موجودہ ملکی اور علاقائی حالات، خاص طور پر مشرق وسطیٰ میں پیدا ہونے والی جنگی صورتحال کی وجہ سے غیر معمولی اہمیت کا حامل ہے۔

(جاری ہے)

انہوں نے کہا کہ اجلاس میں ملکی سلامتی، خارجہ پالیسی، اسلامی دنیا کے اتحاد اور جے یو آئی کے مستقبل کے لائحہ عمل پر بھی اہم فیصلے متوقع ہیں۔ ادھر جے یو آئی سندھ کے پریس سیکریٹری ڈاکٹر اے جی انصاری نے کہا ہے کہ سندھ سے جے یو آئی سندھ کے قائد علامہ راشد محمود سومرو کی قیادت میں وفد اجلاس میں بھرپور شرکت کرے گا اور ایجنڈاز پر اہم تجاویز پیش کرے گا۔