ٴْچیئرپرسن چائلڈ پروٹیکشن بیورو سارہ احمد نے ہارورڈ یونیورسٹی سے پروفیشنل ٹریننگ مکمل کرلی

پیر 23 جون 2025 22:00

Uلاہور (اُردو پوائنٹ اخبارتازہ ترین - آن لائن۔ 23 جون2025ء) چائلڈ پروٹیکشن بیورو پنجاب کی چیئرپرسن اور ممبر صوبائی اسمبلی سارہ احمد نے دنیا کی ممتاز درسگاہ ہارورڈ یونیورسٹی میں چائلڈ پروٹیکشن کے موضوع پر پروفیشنل ٹریننگ کامیابی سے مکمل کرلی ہے۔ اس تربیتی پروگرام کے لئے سارہ احمد کو خصوصی طور پر منتخب کیا گیا تھا جو پاکستان کے لیے ایک قابلِ فخر اعزاز ہے۔

اس موقع پر چیئرپرسن سارہ احمد نے کہا کہ ہارورڈ یونیورسٹی جیسے ادارے سے چائلڈ پروٹیکشن کی پروفیشنل ٹریننگ حاصل کرنا ان کے لئے ایک اعزاز ہے۔ انہوں نے بتایا کہ ٹریننگ کے دوران انہیں یونیورسٹی کے معروف پروفیسروں سے سیکھنے کا موقع ملا جبکہ پروگرام میں نظریاتی تعلیم، عملی سرگرمیوں اور کیس سٹڈیز پر خصوصی توجہ دی گئی۔

(جاری ہے)

سارہ احمد نے بتایا کہ وہ پاکستان کی واحد نمائندہ تھیں جبکہ اٹلی، برازیل، سری لنکا اور دیگر ممالک کے ماہرین نے بھی اس ٹریننگ میں شرکت کی۔

انہوں نے ’’جنسی استحصال، بدسلوکی اور ہراسانی‘‘ کے موضوع پر ایک جامع پریزینٹیشن پیش کی، جسے بین الاقوامی سطح پر خوب سراہا گیا۔ اس پریزینٹیشن میں پاکستان کی جانب سے بچوں کے تحفظ اور استحصال سے بچاؤ کے لئے کی جانے والی کوششوں اور مستقبل کے لائحہ عمل کو اجاگر کیا گیا۔ چیئرپرسن سارہ احمد نے وزیراعلیٰ پنجاب مریم نواز اور حکومت پنجاب کا شکریہ ادا کرتے ہوئے کہا کہ ان کی مسلسل حمایت اور اعتماد کے بغیر یہ کامیابی ممکن نہ تھی۔

انہوں نے اس عزم کا اظہار کیا کہ یہ تربیت چائلڈ پروٹیکشن کے شعبے میں مزید مؤثر اور فعال کردار ادا کرنے میں مددگار ثابت ہوگی۔ انہوں نے مزید کہا کہ بچوں کا تحفظ ہم سب کی اجتماعی ذمہ داری ہے اور وہ اپنی تمام تر توانائیاں اس مقدس فریضے کی ادائیگی کے لئے وقف کرتی رہیں گی۔