فلم سکرین کے بے تاج بادشاہ اداکار سلطان راہی کا 87 واں یوم پیدائش منایاگیا

سلطان راہی نی703پنجابی اور 100اردوفلموں میں اداکاری کے جوہر دکھائے اور160اعزازات اپنے نام کئے

منگل 24 جون 2025 12:59

فلم سکرین کے بے تاج بادشاہ اداکار سلطان راہی کا 87 واں یوم پیدائش منایاگیا

لاہور(اُردو پوائنٹ اخبارتازہ ترین - این این آئی۔ 24 جون2025ء)فن کے سلطان، لیجنڈ اداکار سلطان راہی کا 87 واں یوم پیدائش منایاگیا۔یہ کیسے ممکن ہوسکتا ہے کہ پاکستان کی فلم انڈسٹری کی بات ہو اور سلطان راہی کا ذکر نہ آئے، وہی سلطان راہی جو ربع صدی تک فلم سکرین کے بے تاج بادشاہ رہے، اپنی مضبوط آواز اور ڈائیلاگ ڈیلیوری کی بدولت فن کی بلندیوں کو چھونے والے سلطان راہی کی یاد آج بھی ہزاروں دلوں پر راج کرتے ہیں۔

احمد ندیم قاسمی کے تو شاید وہم وگمان میں بھی نہ ہوگا کہ ان کا تحریر کردہ افسانہ گنڈاسہ صرف پاکستانی فلمی صنعت کی شناخت ہی نہیں بن جائے گا بلکہ 24جون 1938 میں پیدا ہونے والے سلطان راہی کو بھی ایسا اداکار بنا دے گا جسے دنیا پاکستان کے کلنٹ ایسٹ وڈ کے نام سے یاد کرے گی۔

(جاری ہے)

سلطان راہی نے اپنے کیرئیر کا آغاز تو ایکسٹرا کی حیثیت سے کیا لیکن جب حسن عسکری نے افسانہ گنڈاسہ کو وحشی جٹ کی شکل میں پردہ سکرین پر منتقل کیا تو یہ فلم پنجابی زبان کی ایک رجحان ساز فلم ثابت ہوئی۔

وحشی جٹ کے بعد مولا جٹ پردہ سکرین کی زینت بنی تو اِس نے مقبولیت کے تاریخ ساز ریکارڈ ز قائم کردیئے، ایسی شاندار فلم کہ جس میں مصطفی قریشی کی جاندار اداکاری نے بھی سلطان راہی کا بھرپور ساتھ دیا۔اپنے عروج کے زمانے میں اداکارہ آسیہ، نادرہ اور انجمن کے ساتھ سلطان راہی کی جوڑی کو بہت پسند کیا گیا تو متعدد فلموں کے گیتوں نے بھی فلم بینوں میں بے پناہ مقبولیت حاصل کی۔40سال پر محیط اپنے کیریئر کے دوران سلطان راہی نے کم وبیش703 پنجابی اور 100 اردوفلموں میں اداکاری کے جوہر دکھائے اور تقریبا 160 اعزازات اپنے نام کئے۔جب 9 جنوری 1996 کو گوجرانوالہ بائی پاس کے قریب فن کے سلطان کا قتل ہوا تو یہ قتل اپنے ساتھ پاکستان کی فلم انڈسٹری کو بھی لے ڈوبا۔