استور ، کاروبار میں ڈیجیٹل تبدیلی وقت کی اہم ضرورت ہے،صوبائی وزیر پلاننگ اینڈ ڈویلپمنٹ

بدھ 25 جون 2025 12:20

استور (اُردو پوائنٹ اخبارتازہ ترین - اے پی پی۔ 25 جون2025ء) اقوامِ متحدہ کے ترقیاتی ادارے (UNDP) اور کوڈ پاکستان کے اشتراک سے ڈیجیٹل ترقی کے لیے اقدامات، کاروبار پر ڈیجیٹل تبدیلی کے اثرات کے عنوان سے ایک اہم نشست کا انعقاد مشرف ہال، قراقرم انٹرنیشنل یونیورسٹی گلگت میں کیا گیا۔ اس تقریب کا مقصد UNDP کی جاری کردہ قومی انسانی ترقی رپورٹ (NHDR 2024) کی روشنی میں پاکستان میں ڈیجیٹل تبدیلی کی افادیت کو اجاگر کرنا اور متعلقہ اسٹیک ہولڈرز کے مابین شعور اور شراکت داری کو فروغ دینا تھا۔

تقریب کے مہمانِ خصوصی صوبائی وزیر منصوبہ بندی و ترقیات، راجہ ناصر علی خان تھے جنہوں نے اپنے خطاب میں نوجوانوں کو مستقبل کا معمار قرار دیتے ہوئے کہا کہ آج کے بچے کل کا روشن مستقبل ہیں۔

(جاری ہے)

گلگت بلتستان کے تعلیم یافتہ نوجوان ہمارا فخر ہیں، ہمیں اُن کی بھرپور رہنمائی کرنی ہوگی تاکہ وہ ڈیجیٹل ٹیکنالوجی کے مثبت پہلوؤں سے فائدہ اٹھا سکیں۔

والدین اور اساتذہ کی ذمہ داری ہے کہ وہ بچوں کو سمارٹ فونز کے تعمیری استعمال کی طرف راغب کریں۔انہوں نے مزید کہا کہ ہمیں اپنے تعلیمی نظام کو جدید خطوط پر استوار کرتے ہوئے، ڈیجیٹل مہارتوں، اسکول ایجوکیشن اور آمدنی بڑھانے والے ہنر سکھانے پر توجہ دینی ہوگی تاکہ نوجوان خود کفیل بن سکیں۔اس تقریب میں مختلف حکومتی اداروں، نجی شعبے، سول سوسائٹی، میڈیا،قراقرم یونی سٹی کے طلباء و طالبات اور دیگر اسکولوں کے طلباء نے بھرپور شرکت کی۔

سیشن میں اس بات پر زور دیا گیا کہ ڈیجیٹل ٹیکنالوجی کے ذریعے کاروبار کو بہتر، مؤثر، اور منافع بخش بنایا جا سکتا ہے، خاص طور پر گلگت بلتستان جیسے خطے میں جہاں جغرافیائی چیلنجز موجود ہیں۔مقررین کا کہنا تھا کہ ڈیجیٹل تبدیلی کے ذریعے مقامی کاروبار قومی اور بین الاقوامی منڈیوں تک رسائی حاصل کر سکتے ہیں، تاہم اس کے لیے انفراسٹرکچر،ڈیجیٹل خواندگی اور مہارتوں میں بہتری لانا لازمی ہے۔\378