اسپیکرقومی اسمبلی سردارایازصادق سے پاکستان میں تعینات فلسطین سفیر کی ملاقات

بدھ 25 جون 2025 22:44

اسلام آباد(اُردو پوائنٹ اخبارتازہ ترین - آن لائن۔ 25 جون2025ء)اسپیکر قومی اسمبلی سردار ایاز صادق سے پاکستان میں تعینات فلسطین کے سفیر ڈاکٹر ذہیر زید کی ملاقات۔اسپیکر قومی اسمبلی سردار ایاز صادق نے غزہ میں جاری انسانی حقوق کی سنگین خلاف ورزیوں کی شدید الفاظ میں مذمت کی۔ اسپیکر قومی اسمبلی نے کہا کہ غزہ میں جاری اسرائیلی جارحیت ایک عظیم انسانی المیہ ہے اسرائیلی حملوں میں پچاس ہزار سے زائد انسانی جانوں کا ضیاع ہر پاکستانی کے لیے دلخراش سانحہ ہے۔

سردار ایاز صادق نے کہا کہ غزہ میں معصوم بچوں کی مسلسل شہادتیں عالمی ضمیر کے لیے ایک کڑا امتحان ہیں اسرائیل کی جانب سے غزہ کیلئے امدادی سامان کی فراہمی روکنا، خوراک کو بطور ہتھیار استعمال کرنے کے مترادف ہے پاکستان اپنے فلسطینی بھائیوں کی ہر سطح پر اخلاقی، سفارتی حمایت جاری رکھے گا۔

(جاری ہے)

انہوں نے کہا کہ اسرائیل کا ایران پر حملہ بین الاقوامی قوانین کی صریحاً خلاف ورزی ہے، جو خطے اور دنیا کے امن کے لیے شدید خطرہ ہے۔

اسپیکر قومی اسمبلی کا ایران اور اسرائیل کے مابین جنگ بندی کے اعلان کا خیر مقدم کیا اور کہا کہ دنیا کو اس وقت جنگوں کی نہیں، امن کی ضرورت ہے پاکستان نے خطے میں ہمیشہ امن کو فروغ دینے کیلئے کردار ادا کیا ہے پاکستان نے بھارتی جارحیت کا مؤثر اور منہ توڑ جواب دیا ہے پاکستان اور بھارت جنگ میں بھارت اسرائیل گٹھ جوڑ واضح ہو گیا پاکستان اسرائیل کو ریاست نہیں بلکہ دہشت گرد تنظیم کے بطور تسلیم کرتا ہے۔

اس موقع پر فلسطینی سفیر نے کہا کہ پاکستان نے ہمیشہ فلسطین کے مؤقف کی غیر متزلزل حمایت کی ہے، جس پر ہم تہہ دل سے شکر گزار ہیں غزہ کے مظلوم عوام پاکستان کے عوام کی ہمدردی اور یکجہتی کو قدر کی نگاہ سے دیکھتے ہیں ہمیں فخر ہے کے پاکستان ہمارے ساتھ ہے ہمیں امید ہے کہ پاکستان عالمی فورمز پر فلسطین کے حق میں آواز بلند کرتا رہے گا اس وقت فلسطین کو انسانی امداد، سفارتی اور بین الاقوامی حمایت کی ضرورت ہے، پاکستان اور فلسطین کے مابین، برادرانہ تعلقات دونوں اقوام کی تاریخی قربت کا ثبوت ہیں، جنہیں مزید فروغ دینے کی ضرورت ہے۔