لوگ انتظارکرتے رہے کہ شاید کوئی بچانے آئے گا، شاہد آفریدی

دریائے سوات میں ڈوبے افراد کو بچانا جن کی ذمے داری تھی، ان کی ترجیحات کچھ اور ہیں‘ٹویٹ

ہفتہ 28 جون 2025 13:03

لوگ انتظارکرتے رہے کہ شاید کوئی بچانے آئے گا، شاہد آفریدی

لاہور(اُردو پوائنٹ اخبارتازہ ترین - این این آئی۔ 28 جون2025ء)پاکستان کرکٹ ٹیم کے سابق کپتان شاہد خان آفریدی نے دریائے سوات میں ڈوبنے والے افراد کے لیے افسوس کا اظہار کرتے ہوئے کہا ہے کہ انہیں بچانے کی ذمے داری جن کی ہے ان کی ترجیحات کچھ اور ہیں۔یہ بات شاہد خان آفریدی نے اپنے ایکس اکاؤنٹ پر کیے گئے ٹویٹ میں کہی ہے۔خیال رہے کہ دریائے سوات کا سیلابی ریلہ 17 سیاحوں کو بہا لے گیا، جس سے 9 افراد جاں بحق ہو گئے، جبکہ 4 کو بچا لیا گیا۔

(جاری ہے)

عینی شاہدین کے مطابق صبح ناشتے کے بعد سیاحوں نے تصویریں لینے کے لیے دریا کے خشک حصے کا رخ کیا تھا کہ اچانک بے رحم موجوں نے انہیں گھیر لیا، لوگ جان بچانے کے لیے ٹیلے پر چڑھ گئے، مدد کے لیے پکارتے رہے، لیکن دریا کا بہاؤ اتنا تیز تھا کہ کوئی اس کے سامنے ٹھہر نہیں سکا۔اس حوالے سے پاکستانی ٹیم کے سابق کپتان شاہد خان آفریدی نے کہا ہے کہ دریائے سوات میں ڈوبنے والے معصوم لوگ آخری لمحے تک بے بسی کی تصویر بن کر یہ انتظار کرتے رہے کہ شاید کوئی انہیں بچا لے گا۔شاہد آفریدی نے کہا کہ ان لوگوں کو اندازہ نہیں تھا کہ جن کی یہ ذمے داری ہے، ان کی ترجیحات کچھ اور ہیں۔