تحریک انصاف کا سپیکر پنجاب اسمبلی کے خلاف عدالت جانے کا فیصلہ

آپ ہمیں ایک سال کے لیے معطل کر دں، 150 کارروائیوں کے لیے کر دیں، آپ اندر بیٹھیں، عمران خان کے ایم پی ایز کو کسی بھی ایوان کی ضرورت نہیں؛ اپوزیشن لیڈر ملک احمد بھچر کی پریس کانفرنس

ساجد علی ہفتہ 28 جون 2025 16:10

تحریک انصاف کا سپیکر پنجاب اسمبلی کے خلاف عدالت جانے کا فیصلہ

لاہور ( اُردو پوائنٹ اخبارتازہ ترین۔ 28 جون 2025ء ) پاکستان تحریک انصاف نے سپیکر پنجاب اسمبلی ملک محمد احمد خان کے خلاف عدالت جانے کا فیصلہ کرلیا۔ اس حوالے سے پریس کانفرنس کرتے ہوئے پنجاب اسمبلی میں اپوزیشن لیڈر ملک احمد بھچر نے کہا کہ سپیکر اسمبلی کی جانب سے پی ٹی آئی اراکین پر عائد جرمانے کو عدالت میں چیلنج کریں گے، ہم کسی ریفرنس یا جرمانے سے نہیں ڈرتے، ہمیں کوئی ایوان سے ایک گھنٹے کے لیے نکال کر تو دیکھیں انہیں سمجھ لگ جائے گی۔

ان کا کہنا ہے کہ آپ ہمیں ایک سال کے لیے معطل کر دں، 150 کارروائیوں کے لیے کر دیں، آپ اندر بیٹھیں، عمران خان کے ایم پی ایز کو کسی بھی ایوان کی ضرورت نہیں، پی ٹی آئی اراکین پر جو جرمانہ عائد کیا گیا ہے اسے عدالت میں چیلنج کریں گے، اس سے آگے کا لائحہ عمل ہم پارلیمانی کمیٹی سے مشاورت کے بعد طے کریں گے۔

(جاری ہے)

واضح رہے کہ سپیکر نے پنجاب اسمبلی میں اپوزیشن کے 26 ارکان کو ہنگامہ آرائی کرنے پر 15 اجلاسوں کے لیے اسمبلی کی کارروائی سے معطل کر دیا ہے، نوٹیفکیشن کے مطابق 26 اپوزیشن اراکین کے خلاف قواعد کی سنگین خلاف ورزی، ایوان میں ہلڑ بازی، ایجنڈا پیپرز پھاڑنے اور نعرے بازی کے تحت کارروائی کی گئی۔

اس کے علاوہ پنجاب اسمبلی کے سپیکر ملک محمد احمد خان نے ایوان میں ہنگامہ آرائی کے معاملے پر الیکشن کمیشن کو ریفرنس بھیجنے کا بھی اعلان کیا، انہوں نے کہا کہ ایوان میں اپوزیشن کا رویہ افسوسناک ہے، غنڈہ گردی کرنا کسی بھی سیاسی رہنما کا حق نہیں، ایوان کو قواعد و ضوابط سے چلانا میری ذمہ داری ہے اور میں جمہوری اور پارلیمانی روایات پر یقین رکھتا ہوں، اگر کوئی رکن ایوان کے ضابطوں کو تسلیم نہیں کرتا تو اسے اسمبلی میں داخلے سے روکا جائے گا اور یہ ناقابل قبول ہے کہ کوئی رکن کتابیں اُٹھا کر دوسروں پر پھینکے۔