کرم ،پارہ چنار و ملحقہ علاقوں میں موسلادھار ،طوفانی بارش ،سیلابی ریلوں نے تباہی مچادی

کئی رابطہ سڑکیں بہہ گئیں ،مکانات‘ باغات‘ فصلوں اور بجلی کھمبوں کوشدید نقصان پہنچا

ہفتہ 28 جون 2025 18:40

کوہاٹ(اُردو پوائنٹ اخبارتازہ ترین - این این آئی۔ 28 جون2025ء) قبائلی ضلع کرم کے صدر مقام پارہ چنار اور ملحقہ علاقوں میں موسلادھار اورطوفانی بارش اور سیلابی ریلوں نے تباہی مچادی جہاں ندی نالوں میں آنے والی طغیانی کی زدمیں آکر کئی رابطہ سڑکیں بہہ گئیں جبکہ مکانات‘ باغات‘ فصلوں اور بجلی کھمبوں کوشدید نقصان پہنچا جس کی وجہ سے آمدورفت بری طرح متاثر ہوکر مقامی لوگوں کو شدید مشکلات کا سامنا ہے۔

موصولہ اطلاعات کے مطابق جمعہ اور ہفتہ کی درمیانی شب پارہ چنار اور ملحقہ پہاڑی علاقوں شدید بارش ہوئی جس کے نتیجے میں ندی نالوں میں زبردست طغیانی آگئی جس کی زدمیں آکر پارہ چنار شہرکو ملحقہ علاقوں سے ملانے والی کئی رابطہ سڑکوں کا بڑا حصہ سیلابی ریلے کی نذر ہوگیا جبکہ ایک پل بھی منہدم ہو گیا۔

(جاری ہے)

یلابی ریلے کی زدمیں آکر ندی نالوں کے کنارے آباد کئی گھروں کو شدید نقصان پہنچا اور کئی گھروں کی چاردیواریاں زمین بوس ہوگئیںتاہم خوش قسمتی سے کوئی جانی نقصان نہیںہوا۔

ادھر شدید بارشوں کے نتیجے میں دریائے کرم میں بھی درمیانے درجہ کا سیلاب آیا ہے ۔ڈپٹی کمشنر کرم اشفاق خان نے ہفتہ کے روز بارش اور سیلابی ریلوں سے متاثرہ مقامات کا دورہ کیا۔ انہوں نے زیڑان روڈ، زیڑان بائی پاس، کراخیلہ روڈ، شلوزان روڈ اور غلام جان پل کی حالت کا جائزہ لیا۔اس موقع پر ایڈیشنل ڈپٹی کمشنر (ریلیف)، اسسٹنٹ کمشنر اپر کرم، ریسکیو 1122 افسران کے علاوہ متعلقہ محکموں کے حکام بھی ان کے ہمراہ تھے۔

ڈپٹی کمشنر نے تمام متعلقہ محکموں کو ہدایت کی کہ ہنگامی طور پر متاثرہ سڑکوں اور گزرگاہوں کی صفائی اور بحالی کا کام شروع کیا جائے اوربند سڑکوں اور پلوں کو فوری طور پر آمد و رفت کے قابل بنایا جائے ۔ انہوں نے واٹر سپلائی اور نکاسی آب کے نظام کی بھی ہنگامی بنیادوں پر مرمت کی ہدایات دیں۔