مشیر کھیل مینا مجید بلوچ کالاہور قلندرز کے سی ای او عاطف رانا اور انٹرنیشنل کرکٹرز زمان خان کے ہمراہ یونیورسٹی آف بلوچستان کا دورہ

کوئٹہ (اُردو پوائنٹ اخبارتازہ ترین - اے پی پی۔ 28 جون2025ء) بلوچستان میں نوجوانوں کو کھیلوں کے مواقع فراہم کرنے کی ایک اہم کاوش کے تحت صوبائی مشیر کھیل مینا مجید بلوچ نے لاہور قلندرز کے سی ای او عاطف رانا، انٹرنیشنل کرکٹرز زمان خان اور محمد نعیم کے ہمراہ یونیورسٹی آف بلوچستان کا دورہ کیا۔ اس موقع پر انہوں نے طلبہ و طالبات سے ملاقات کی، ان سے گھل مل گئیں اور ان کے کرکٹ سے متعلق جذبے کو سراہا۔

یہ دورہ وزیر اعظم یوتھ پروگرام کے تحت بیوٹمز یونیورسٹی کوئٹہ میں جاری کرکٹ ٹیلنٹ ہنٹ ٹرائلز کا حصہ ہے، جن میں بلوچستان کے مختلف اضلاع سے تعلق رکھنے والے دو ہزار دو سو سے زائد نوجوان لڑکے اور لڑکیاں رجسٹریشن کروا چکے ہیں۔ ان کھلاڑیوں کے ٹرائلز بین الاقوامی معیار کے کوچز اور تجربہ کار کرکٹرز کی نگرانی میں کیے جا رہے ہیں۔

(جاری ہے)

تقریب سے خطاب کرتے ہوئے صوبائی مشیر کھیل مینا مجید بلوچ نے کہا کہ وزیر اعلیٰ بلوچستان میر سرفراز بگٹی کی قیادت میں صوبائی حکومت نوجوانوں کو ہر میدان میں مواقع فراہم کرنے کے لیے پرعزم ہے۔

انہوں نے کہا کہ کرکٹ کے ذریعے نہ صرف بلوچستان کے نوجوانوں کو قومی اور بین الاقوامی سطح پر سامنے لایا جا رہا ہے بلکہ اس سے صوبے کا مثبت تشخص بھی ابھر کر سامنے آئے گا۔ لاہور قلندرز کے سی ای او عاطف رانا نے اس موقع پر گفتگو کرتے ہوئے کہا کہ ان کا بلوچستان کا دورہ بہت کامیاب رہا ہے۔ انہوں نے کہا کہ یہاں کے نوجوانوں میں بے پناہ ٹیلنٹ موجود ہے جسے نکھارنے اور آگے بڑھانے کی ضرورت ہے۔

ان کا کہنا تھا کہ لاہور قلندرز نہ صرف کھیل بلکہ دیگر شعبہ جات میں بھی بلوچستان کے نوجوانوں کو مواقع فراہم کرے گی۔ انہوں نے مزید بتایا کہ اس لیگ کے تحت بلوچستان کی پانچ ٹیمیں آپس میں مقابلہ کریں گی، جن میں سے ایک مرد اور ایک خاتون ٹیم آل پاکستان لیگ کے لیے کوالیفائی کریں گی۔ بہترین کارکردگی دکھانے والے پانچ کھلاڑیوں کو لاہور ہائی پرفارمنس سنٹر میں اسکالرشپ اور تربیت دی جائے گی۔

اس موقع پر طلبہ و طالبات نے مہمان کھلاڑیوں اور آفیشلز سے سوالات کیے جن کے تفصیلی جوابات دیے گئے۔ تقریب میں شرکاء کا جوش و خروش دیدنی تھا۔ تقریب میں پرو وائس چانسلر بلوچستان یونیورسٹی ڈاکٹر شاہوانی، کمشنر کوئٹہ ڈویژن حمزہ شفقات، ڈپٹی کمشنر کوئٹہ کیپٹن (ر) مہراللہ بادینی، ڈائریکٹر جنرل اسپورٹس بلوچستان یاسر خان بازئی اور دیگر معزز مہمان بھی شریک تھے۔ یہ تقریب نہ صرف کرکٹ بلکہ بلوچستان میں نوجوانوں کی ہمہ جہت ترقی اور مثبت سرگرمیوں کے فروغ کی جانب ایک عملی قدم ہے۔