وزیراعلیٰ پنجاب کی ہدایت پر صوبائی وزراء فیصل کھوکھر ،بلال یاسین کے دورے،یوم عاشورہ کے سکیورٹی انتظامات کا جائزہ لیا

سکیورٹی پلان، رضا کاروں کی تعیناتی، مانیٹرنگ، داخلی و خارجی راستوں پر چیکنگ اور ہنگامی صورتحال سے نمٹنے کی تیاریوں پر بریفنگ

اتوار 29 جون 2025 13:15

لاہور(اُردو پوائنٹ اخبارتازہ ترین - این این آئی۔ 29 جون2025ء)وزیراعلیٰ پنجاب مریم نواز شریف کی خصوصی ہدایت پر صوبائی وزراء نے محرم الحرام کے حوالے سے جاری سکیورٹی انتظامات کا تفصیلی جائزہ لینے کے لیے رات گئے لاہور کے مرکزی عزاداری مقامات کا دورہ کیا۔صوبائی وزیر کھیل و محنت ملک فیصل ایوب کھوکھر نے صوبائی وزیر خوراک بلال یاسین، وزیراعلیٰ پنجاب کی معاونِ خصوصی ثانیہ عاشق، سی سی پی او لاہور بلال صدیق کمیانہ، کمشنر لاہور زید بن مقصود، ڈی سی لاہور سید موسیٰ رضا اور دیگر اعلیٰ افسران کے ہمراہ نثار حویلی، کربلا گامے شاہ اور پانڈو سٹریٹ امام بارگاہ کا دورہ کیا۔

دورے کے دوران وزراء نے یوم عاشورہ کے مرکزی جلوس کے روٹس اور دیگر اہم مقامات پر کیے گئے سکیورٹی اقدامات کا تفصیلی جائزہ لیا۔

(جاری ہے)

اس موقع پر پولیس و ضلعی انتظامیہ کے افسران نے معزز مہمانوں کو سکیورٹی پلان، رضا کاروں کی تعیناتی، سی سی ٹی وی مانیٹرنگ، داخلی و خارجی راستوں پر چیکنگ اور ہنگامی صورت حال سے نمٹنے کی تیاریوں پر بریفنگ دی۔صوبائی وزیر ملک فیصل ایوب کھوکھر نے موقع پر انتظامیہ کو ہدایات جاری کرتے ہوئے کہا کہ جلوسوں کے راستوں پر مکمل سکیورٹی اور بارشوں کے باعث ممکنہ رکاوٹوں کو فوری دور کیا جائے۔

صفائی، روشنی، پانی، میڈیکل کیمپ اور دیگر سہولیات یقینی بنائی جائیں۔انہوں نے منتظمین سے ملاقات کے دوران مکمل تعاون کی یقین دہانی کرواتے ہوئے کہا کہ محرم الحرام میں امن و امان کا قیام حکومت پنجاب کی اولین ترجیح ہے۔منتظمین نے حکومتی سکیورٹی اقدامات پر اطمینان کا اظہار کرتے ہوئے تمام اداروں کے باہمی تعاون کو سراہا۔مزید برآں، ملک فیصل ایوب کھوکھر نے عوام الناس سے اپیل کرتے ہوئے کہا کہ اہل لاہور محرم الحرام کے دوران سکیورٹی کے معاملات میں پولیس و انتظامیہ سے مکمل تعاون کریں اور ایک ذمہ دار شہری ہونے کا ثبوت دیں۔

اس موقع پر بلال یاسین کا کہنا تھا کہ مجالس و جلوس کے روٹس اور حساس مقامات پر سکیورٹی کو ہائی الرٹ رکھا گیا ہے جبکہ جلوسوں کی سی سی ٹی وی کے ذریعے کنٹرول رومز سے مسلسل نگرانی جاری ہے۔ دفعہ 144 پر عمل درآمد اور غیر منظور شدہ سرگرمیوں پر مکمل پابندی بھی یقینی بنائی جا رہی ہے تاہم حکومتِ پنجاب کی ہدایات پر انتظامیہ، پولیس اور دیگر ادارے محرم الحرام کے پُرامن اور باوقار انعقاد کے لیے دن رات سرگرم عمل ہیں۔