Live Updates

پشاور میں دو روزہ لرننگ فورم کا انعقاد

پیر 30 جون 2025 19:50

پشاور(اُردو پوائنٹ اخبارتازہ ترین - این این آئی۔ 30 جون2025ء)برٹش کونسل کے تحت برطانوی حکومت کے تعاون سے جاری پروگرام آواز II کے تحت خیبر پختونخوا میں سماجی تبدیلی کیلئے ہونے والی کوششوں کو سراہنے اور مضبوط کرنے کے لیے پشاور میں دو روزہ لرننگ فورم کا انعقاد کیا گیا۔ یہ ایونٹ عمر اصغر خان ڈیویلپمنٹ فاؤنڈیشن (OAKDF) کے اشتراک سے منعقد ہوا، فورم میں ایک سو زیادہ کمیونٹی لیڈرز، آواز ڈسٹرکٹ فورم اور سول سوسائٹی کے دیگر کارکنان اور سرکاری نمائندوں نے شرکت کی۔

فورم کا افتتاح خیبر پختونخوا کے وزیر برائے سماجی بہبود سید قاسم علی شاہ نے کیا۔ اس موقع پر دلچسپ فیلڈ اسٹوریز، انٹرایکٹو سیشنز، اور جامع مباحثوں کا انعقاد کیا گیا جن میں شمولیتی طرز حکمرانی، مقامی قیادت، اور محروم طبقات کے حقوق کو اجاگر کیا گیا۔

(جاری ہے)

پالیسی ماہرین رخشندہ ناز اور وقاص پراچہ نے عوامی احتساب اور شمولیتی بجٹ سازی پر ایک کلیدی سیشن کی قیادت کی جبکہ آواز II کی ٹیم لیڈ ڈاکٹر یاسمین زیدی نے کمیونٹی کی آوازوں کے مرکزی کردار پر زور دیا، (OAKDF) کی راشدہ دوہد نے مقامی قیادت کی تبدیلی کی قوت کو اجاگر کیا۔

صوبائی برائے سماجی بہبود سید قاسم علی شاہ، سابق مشیر وزیر زادہ اور ایڈیشنل سیکریٹری عمرا خان نے آواز II کی جانب سے صوبے میں مساوات اور سماجی ہم آہنگی کے فروغ کی کوششوں کو سراہا اور محکمہ سوشل ویلفیئر کی جانب سے محروم طبقات کی فلاح و بہبود کے لیے جاری اقدامات پر روشنی ڈالی۔