Live Updates

آل پاکستان انجمن تاجران کا پٹرولیم قیمتوں میں اضافے پر تشویش کا اظہار

حکومت پیٹرولیم پر وصول کئے جانے والے ٹیکسز کی شرح میں کمی کرے ‘ صدر اشرف بھٹی

منگل 1 جولائی 2025 15:43

لاہور(اُردو پوائنٹ اخبارتازہ ترین - این این آئی۔ 01 جولائی2025ء)آل پاکستان انجمن تاجران کے مرکزی صدر اشرف بھٹی نے پٹرولیم مصنوعات کی قیمتوں میں اضافے پر شدید تشویش کا اظہار کرتے ہوئے کہا ہے کہ حکومت پیٹرولیم پر وصول کئے جانے والے ٹیکسز کی شرح میں کمی کرے ،اب وقت آ گیا کہ معیشت کی پائیداری اوراس کے تسلسل کیلئے قومی پالیسی مرتب کی جائے ۔

(جاری ہے)

اپنے بیان میں انہوں نے کہا کہ پیٹرولیم کی قیمتوں میں یکدم اتنے بڑے اضافے سے ملک میں مہنگائی کا طوفان آئے گا ، عوام کی قوت خرید پہلے ہی جواب دے چکی ہے جس سے ہر طرح کے کاروبار میں شدید مندی کا رجحان ہے ۔

انہوںنے کہا کہ پیٹرولیم مصنوعات پر مقررہ حد سے زیادہ ٹیکسز وصول کئے جارہے ہیں ،حکومت عوام پر بوجھ ڈالنے کے بجائے پٹرولیم مصنوعات پرٹیکسز میں کمی لا کر عوام کو ریلیف دے ۔