کراچی میں 32 مرکزی سڑکوں سے پارکنگ فیس مکمل طور پر ختم،نوٹیفکیشن جاری

منگل 1 جولائی 2025 15:59

کراچی(اُردو پوائنٹ اخبارتازہ ترین - این این آئی۔ 01 جولائی2025ء)کراچی میں 106 مرکزی سڑکوں میں سے 32 پر پارکنگ فیس مکمل طور پر ختم کر دی گئی ، جس کا نوٹیفکیشن بھی جاری کردیا گیاہے۔نوٹیفکیشن کے مطابق بلدیہ عظمیٰ کی 32 سڑکوں اور مقامات پر پارکنگ مفت ہو گی، ضلع جنوبی میں 3 اور ضلع کیماڑی کے 2 مقامات پر پارکنگ مفت ہوگی۔ضلع وسطی میں 5، ملیر اور کورنگی میں 7 مقامات پر پارکنگ فری ہو گی جبکہ ضلع شرقی میں 15 مقامات پر پارکنگ بالکل مفت ہو گی۔

نوٹیفکیشن کے مطابق ضلع جنوبی، وسطی اور شرقی کی 11 وال باؤنڈری پارکنگ پر مقررہ فیس رہی گی۔جیلانی سینٹر موبائل مارکیٹ، ناز پلازہ سے آمنہ ٹاور ایم اے جناح روڈ پر پارکنگ فری ہو گی جبکہ کوثر میڈیکو سے ایم ڈبلیو ٹاور ایم اے جناح روڈ پر پارکنگ فری ہو گی۔

(جاری ہے)

نوٹیفکیشن کے مطابق شارجہ مال سے کوہِ نور ہال حب ریور روڈ پر پارکنگ فری ہو گی، کے پی ٹی گیٹ نمبر 1 سے شیل پمپ ایم اے جناح روڈ پر پارکنگ فری ہو گی۔

ضلع وسطی میں ہارون شاپنگ مال، سرینا مارکیٹ پر پارکنگ فری ہوگی، لیاقت آباد سپر مارکیٹ سے لیاقت آباد نمبر 10 ایس ایم توفیق روڈ پر پارکنگ فری ہو گی۔نوٹیفکیشن کے مطابق چیز سپر اسٹور شاہراہِ پاکستان، سینٹرم شاپنگ مال راشد منہاس روڈ، کفایہ اور اومیگا مال نارتھ کراچی پر پارکنگ فری ہوگی۔