حضرت امام حسینؓ کا اسوہ حسینیؓ ہمارے لیے مشعل راہ ہے جس پر عمل پیرا ہوکر ہم اپنی دین و دنیا سوار سکتے ہیں، حامد سعید کاظمی

منگل 1 جولائی 2025 22:16

ملتان (اُردو پوائنٹ اخبارتازہ ترین - اے پی پی۔ 01 جولائی2025ء) سابق وفاقی وزیر مذہبی امور و سربراہ نظامِ مصطفی پارٹی مفکر اسلام صاحبزادہ علامہ سید حامد سعید کاظمی نے کہا ہے کہ حضرت امام حسینؓ کا اسوہ حسینیؓ ہمارے لیے مشعل راہ ہے جس پر عمل پیرا ہوکر ہم اپنی دین و دنیا سوار سکتے ہیں، محرم الحرام ہمیں اخوت اور اتحاد امت کا درس دیتا ہے، حضرت امام حسینؓ نے کربلا میں سرکٹا کر حق و صداقت کا علم بلند کیا اور دین اسلام کو تاقیامت بقاءبخشی ، حضرت امام حسینؓ کی لازوال اور عظیم قربانی صرف مسلمانوں کے لیے ہی نہیں دنیا کے تمام مذاہب کے لیے تھی جس کے ذریعہ انہوں نے حقیقی امن مساوات برابری اور بھائی چارہ کا درس عام کیا ۔

ان خیالات کا اظہار انہوں نے ینگ پاکستانیز آرگنائزیشن اور رائل انسٹی ٹیوٹ آف میڈیکل سائنسز رمز کالج ملتان کے زیر اہتمام گیارہویں سالانہ ”سلام یا حسینؓ “ سیمینار سے بحیثیت مہمان خصوصی خطاب میں کیا ۔

(جاری ہے)

تقریب کی صدارت ڈائریکٹر حج وازرت مذہبی امور و بین المذاہب ہم آہنگی پاکستان ریحان عباس کھوکھر نے کی جبکہ مہمانان خصوصی میں سجادہ نشین دربار حضرت نواب سخی ملتان ، مخدوم سید زوہیب گیلانی، سجادہ نشین دربار حضرت داود جہانیاں ملتان مخدوم شعیب اکمل قریشی ہاشمی، سابق ڈسٹرکٹ آفیسر سپیشل ایجوکیشن ملتان میاں محمد ماجد، ماہر تعلیم پروفیسر ڈاکٹر ریاض حسین، ڈین رمز کالج ڈاکٹر نثار الرحمان، ڈائریکٹر رمز کالج محمد اسلم بیگ، معروف ماہر تعلیم رانا محمد طفیل اور صدر ینگ پاکستانیز آرگنائزیشن نعیم اقبال نعیم شامل تھے ۔

اس موقع پر خطاب کرتے ہوئے علامہ سید حامد سعید کاظمی نے کہا کہ حضور نبی کریم ﷺنے بچپن میں ہی حسنین کریمین کے جنت کے نوجوانوں کے سردار ہونے کی بشارت دی جس میں اللہ تبارک و تعالیٰ کی رضا و مرضی شامل تھی۔ حضرت امام حسینؓ کی قربانی سے واضح ہوا کہ حق ہمیشہ فتح یاب ہوتا ہے ۔