خیبرپختونخوا کے مختلف اضلاع میںِ فائرنگ کے 3 واقعات اور ٹریفک حادثہ میں 4 افراد جاں بحق ، 8 افراد زخمی

جمعرات 3 جولائی 2025 16:24

پشاور (اُردو پوائنٹ اخبارتازہ ترین - اے پی پی۔ 03 جولائی2025ء) خیبرپختونخوا کے مختلف اضلاع میں فائرنگ کے 3 واقعات اور ٹریفک حادثہ میں 4 افراد جاں بحق اور 8زخمی ہو گئے۔ پولیس کے مطابق ضلع بنوں کے علاقہ حوید خاص میں نامعلوم افراد نےپرائیویٹ گارڈز پر فائرنگ کر دی جس کے نتیجے میں ایک گارڈ جاں بحق اور ایک زخمی ہو گیا۔ پولیس کی جانب سے بتایا گیا کہ اس واردات کے دوران حملہ آور چوکیداروں کا اسلحہ بھی ساتھ لے گئے۔

ادھر بنوں میریان پولیس سٹیشن پر ڈرون سے حملہ ہوا ہے، جس کے نتیجے میں 2 شہریوں کے زخمی ہونے کے اطلاعات ہیں، پولیس نے واقعے کی تحقیقات شروع کر دی ہیں ۔دوسری طرف ضلع دیر بالا کے علاقے براول میں نامعلوم افراد کی فائرنگ سے شوہر جاں بحق اور بیوی زخمی ہو گئی۔

(جاری ہے)

پولیس نے اس حوالے سے کہا ہے کہ نامعلوم افراد نے مفتی حبیب کے گھر پر فائرنگ کی جس سے مفتی حبیب جاں بحق اور بیوی زخمی ہو گئی ۔

ضلع مہمند میں یکہ غنڈ سرو ڈھنڈو پل کے قریب ٹریفک حادثہ پیش آیا، جس میں ایک شخص جاں بحق اور ایک شدید زخمی ہو گیا، اس سلسلے میں اطلاع موصول ہوتے ہی ریسکیو1122 کی میڈیکل ٹیم اور ایمبولینس جائے حادثہ پر پہنچ گئی۔ریسکیو ذرائع نے بتایا ہے کہ جاں بحق اور زخمی کو ابتدائی طبی امداد فراہم کرتے ہوئے تحصیل ہیڈ کوارٹر ہسپتال شبقدر منتقل کر دیا گیا ہے، جاں بحق ہونے والے شخص کی شناخت محمّد خان کے نام سے ہوئی جبکہ زخمی کا نام دیدار خان بتایا گیا ہے ۔

دوسری طرف ضلع خیبر کی تحصیل باڑہ قبیلہ سپاہ میں زمین کے تنازعے پر فائرنگ سے ایک شخص جاں بحق اور 3 افراد زخمی ہو گئے ۔ پولیس کے مطابق یہ واقعہ باڑہ کے علاقے سپین قبر میں یوسف تالاب کے مقام پر پیش آیا، جہاں محمد رازق قوم سپاہ تپہ شیخ سوران خیل اور مخالف فریق کے درمیان دیرینہ زمینی تنازعہ شدت اختیار کر گیا۔اس دوران فائرنگ سے ڈاکٹر محمد رازق جاں بحق جبکہ شاہ جہاں، حسن خان اور محمد خان شدید زخمی ہو گئے جنہیں فوری طور پر ڈوگرہ ہسپتال منتقل کر دیا گیا ہے۔باڑہ پولیس نے موقع پر پہنچ کر واقعہ کی تفتیش شروع کر دی ہے۔