Live Updates

ٹرمپ ملک بدر کرنے اور امریکی شہریت ختم کرنے کی دھمکی دے رہے ہیں، ظہر ان ممدانی

امریکی صدر نہیں چاہتے کہ میں کام کرنے والے لوگوں کی حقوق کی بات کروں، ٹرمپ اس لئے ان پر حملے کر رہے ہیں کیونکہ وہ محنت کش مڈل کلاس کے خلاف صدارتی اقدامات سے توجہ ہٹانا چاہتے ہیں ،نیویارک کی میئرشپ کی دوڑ میں شامل ڈیموکریٹک امیدوارکا بیان

فیصل علوی جمعہ 4 جولائی 2025 13:04

ٹرمپ ملک بدر کرنے اور امریکی شہریت ختم کرنے کی دھمکی دے رہے ہیں، ظہر ..

نیو یارک(اردوپوائنٹ اخبار تازہ ترین۔04جولائی 2025)نیویارک کی میئرشپ کی دوڑ میں شامل ڈیموکریٹک امیدوار ظہران ممدانی کاکہناہے کہ امریکی صدر ٹرمپ ملک بدر کرنے اور امریکی شہریت ختم کرنے کی دھمکی دے رہے ہیں،امریکی صدر نہیں چاہتے کہ میں کام کرنے والے لوگوں کی حقوق کی بات کروں،اپنے ایک بیان میں ظہران ممدانی نے کہا کہ ڈونلڈ ٹرمپ کا یہ مسئلہ ہے کہ میں ان لوگوں کی بات نہ کروں جنہیں مہنگائی کے باعث نیویارک چھوڑنے پر مجبور کیا گیا۔

صدر ٹرمپ اس لئے ان پر حملے کر رہے ہیں کیونکہ وہ محنت کش مڈل کلاس کے خلاف صدارتی اقدامات سے توجہ ہٹانا چاہتے ہیں لیکن اس کا مقابلہ کروں گا۔انہوں نے کہا کہ صدر ٹرمپ نے اپنی انتخابی مہم میں مہنگائی کم کرنے کا وعدہ کیا تھا جس سے اب وہ منحرف ہو رہے ہیں اس لئے اپنی ناکامی چھپانے کیلئے ان پر حملے کررہے ہیں۔

(جاری ہے)

خیال رہے کہ گزشتہ روز بھی امریکی شہر نیویارک کے میئرل امیدوار ظہران ممدانی کاکہناتھا کہ امریکی صدر ڈونلڈ ٹرمپ عوام میں تفرقہ ڈال رہے ہیں اور حکومت کی ناکامیوں سے توجہ ہٹانے کیلئے مجھ پر ذاتی حملے کررہے تھے۔

وہ اپنا کام جاری رکھیں گے اور ریپبلکن جماعت کی جانب سے اختلاف رائے کو دبانے کی کوششوں کے خلاف لڑیں گے۔غیر ملکی میڈیا رپورٹس کے مطابق ظہران ممدانی نے نیویارک میں ہوٹل اینڈ گیمنگ ٹریڈز کونسل کے صدر دفتر میں ایک ریلی سے خطاب کرتے ہوئے کہا تھاکہ وہ پیچھے نہیں ہٹیں گے۔ مسلمان سیاستدان ظہران ممدانی کا کہنا تھا کہ کل ڈونلڈ ٹرمپ نے کہا کہ مجھے گرفتار کیا جانا چاہیے۔

انہوں نے یہ بھی کہاتھاکہ مجھے ملک بدر کیا جانا چاہیے۔ میری شہریت ختم کی جانی چاہیے۔ اور انہوں نے یہ سب میرے بارے میں کہا ایک ایسے شخص کے بارے میں جو اس شہر کی تاریخ میں کئی نسلوں بعد پہلا مسلمان، جنوبی ایشیائی تارک وطن میئر بن سکتا ہے۔ٹرمپ کو تنقید کا نشانہ بناتے ہوئے ممدانی کا مزید کہنا تھا کہ صدرٹرمپ تقسیم کو ہوا دے رہے ہیں۔ بجائے اس کے کہ وہ تسلیم کریں کہ انہوں نے نہ صرف نیویارک بلکہ امریکہ کے محنت کش امریکیوں کو مایوس کیا ہے۔

ممدانی کا کہنا تھا کہ یہ سب اس لئے ہے کہ میں کون ہوں یا میں کہاں سے آیا ہوں یا میری شکل و صورت یا زبان کیسی ہے اور زیادہ اس لئے ہے کہ وہ توجہ ہٹانا چاہتے ہیں اس بات سے کہ میں کس کیلئے لڑتا ہوں۔ میں محنت کش عوام کیلئے لڑتا رہوں گا۔