انسداد اسمگلنگ کارروائیوں میں 90لاکھ روپے سے زائد کی منشیات پکڑی گئی

تعلیمی اداروں ،ہاسٹلز کے اطراف سمیت مختلف شہروں سے خاتون سمیت 7ملزمان کو گرفتار کیا گیا

ہفتہ 5 جولائی 2025 14:22

لاہور(اُردو پوائنٹ اخبارتازہ ترین - این این آئی۔ 05 جولائی2025ء)ملک بھر میں منشیات فروشوں کے خلاف کارروائیوں کا سلسلہ جاری ہے، اس دوران 90لاکھ روپے سے زائد مالیت کی منشیات برآمد کرلی گئی۔ترجمان کے مطابق اینٹی نارکوٹکس فورس نے تعلیمی اداروں اور ہاسٹلز کے اطراف سمیت مختلف شہروں میں بڑی کارروائیاں کرتے ہوئے خاتون سمیت 7 ملزمان کو گرفتار کر لیا اور مجموعی طور پر 90لاکھ 17ہزار روپے سے زائد مالیت کی 55.678کلوگرام منشیات برآمد کر لی۔

اسلام آباد، لاہور، کراچی اور موٹروے پر 4مختلف کارروائیوں کے دوران مختلف اقسام کی منشیات برآمد کی گئیں۔خاص طور پر تعلیمی اداروں او ر ہاسٹلز کے اردگرد منشیات فروشی کی سرگرمیوں کو ہدف بناتے ہوئے اسلام آباد کے جاپان روڈ پر واقع ایک یونیورسٹی کے قریب کارروائی کی گئی، جہاں ایک ملزم کے قبضے سے 45 نشہ آور گولیاں برآمد کی گئیں۔

(جاری ہے)

ابتدائی تفتیش میں گرفتار ملزم نے اعتراف کیا ہے کہ وہ تعلیمی اداروں کے طلبہ کو منشیات فروخت کرتا تھا۔

دیگر کارروائیوں میں اسلام آباد موٹروے ٹول پلازہ کے قریب خاتون سمیت 2ملزمان سے 850 گرام آئس اور 2.4 کلو مشکوک پاڈر برآمد کیا گیا۔ کراچی کے ناردرن بائی پاس روڈ پر ایک گاڑی سے 25.2 کلوگرام چرس برآمد کی گئی، جب کہ تین ملزمان کو موقع پر گرفتار کیا گیا۔لاہور کے ملتان روڈ پر منصورہ کے قریب کارروائی میں اے این ایف نے ایک رکشے سے 19.2 کلوگرام افیون، 2 کلوگرام ہیروئن اور 6 کلوگرام چرس برآمد کی جب کہ ایک ملزم کو موقع پر دھر لیا گیا۔

ترجمان اے این ایف کے مطابق تمام گرفتار ملزمان کے خلاف انسداد منشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔ اے این ایف کا کہنا ہے کہ تعلیمی اداروں میں نشے کی لت کے خلاف زیرو ٹالرنس پالیسی پر عملدرآمد کیا جا رہا ہے اور اس سلسلے میں ملک گیر سطح پر مربوط کریک ڈان جاری رکھا جائے گا۔