وزیر مملکت حذیفہ رحمان کی چینی وزیر ثقافت و سیاحت سے ملاقات، شعبہ سیاحت میں تعاون کو فروغ دینے پر اتفاق

اتوار 6 جولائی 2025 16:10

اسلام آباد (اُردو پوائنٹ اخبارتازہ ترین - اے پی پی۔ 06 جولائی2025ء) وزیر مملکت برائے ثقافت، سیاحت و ورثہ حذیفہ رحمان نے آج چین کے وزیر ثقافت و سیاحت جناب گاؤ جنگ سے چنگ ڈاؤ میں ایک اہم ملاقات کی۔ اس اعلیٰ سطحی ملاقات میں دونوں ممالک کے مابین ثقافت، سیاحت، عجائب گھروں اور تاریخی ورثے کے تحفظ و بحالی جیسے کلیدی شعبہ جات میں دو طرفہ تعاون کو مزید مستحکم بنانے کے عزم کا اعادہ کیا گیا۔

ملاقات کے دوران حذیفہ رحمان نے پاکستان کی حکومت اور عوام کی جانب سے چین کے ساتھ طویل المدتی اور آزمودہ دوستی پر اطمینان کا اظہار کرتے ہوئے کہا کہ پاکستان اور چین کے درمیان دوستی ہر قسم کے جغرافیائی، سیاسی اور وقتی تقاضوں سے ماورا، سمندر سے گہری، ہمالیہ سے بلند، اور شہد سے میٹھی ہے۔

(جاری ہے)

یہ تعلق صرف حکومتوں کا نہیں بلکہ عوام کے دلوں کا رشتہ ہے۔

دونوں وزراء نے اس بات پر اتفاق کیا کہ ثقافت اور سیاحت کو دوطرفہ تعاون کے نئے باب کے طور پر استعمال کیا جائے گا، جس کے تحت ورثہ سائٹس کی بحالی، تحفظ اور ڈیجیٹل ڈاکیومنٹیشن میں تعاون کیا جائے گا۔ثقافتی وفود کے تبادلے، آرٹ ایگزیبیشنز اور فلم فیسٹیولز کا انعقاد ہوگا۔عجائب گھروں کی ترقی اور میوزیالوجی کے شعبے میں ٹریننگ پروگرام ترتیب دیے جائیں گے۔

سیاحت کو فروغ دینے کے لیے مشترکہ منصوبے اور پالیسی اقدامات طے کیے جائیں گے۔چینی وزیر ثقافت و سیاحت جناب گاؤ جنگ نے حذیفہ رحمان کو رواں برس ستمبر میں چین میں منعقد ہونے والی بین الاقوامی میوزیم کانفرنس میں بطور خصوصی مہمان شرکت کی دعوت دی، جسے وفاقی وزیر مملکت نے شکریہ کے ساتھ قبول کیا اور اسے پاکستان اور چین کے تعلقات کے مزید استحکام کی علامت قرار دیا۔

حذیفہ رحمان نے ملاقات کے دوران چینی قیادت، بالخصوص صدر شی جن پنگ کی پاکستان کے ساتھ غیرمتزلزل حمایت پر شکریہ ادا کرتے ہوئے کہا کہ چین کا تعاون ہر مشکل وقت میں پاکستان کے شانہ بشانہ رہا ہے۔یہ ملاقات نہ صرف دو دوست ممالک کے درمیان ثقافتی و سیاحتی تعاون کو نئی سمت دینے کا ذریعہ بنی بلکہ مستقبل قریب میں عملی اقدامات کے آغاز کے لیے ایک اہم سنگِ میل بھی ثابت ہوگی۔