نشانِ حیدر کا عظیم وارث حوالدار لالک جان پاکستان کے عسکری وقار، قومی خود مختاری اور استحکام کی تابندہ علامت ہے،وزیر داخلہ محسن نقوی

پیر 7 جولائی 2025 08:50

اسلام آباد (اُردو پوائنٹ اخبارتازہ ترین - اے پی پی۔ 07 جولائی2025ء) وفاقی وزیر داخلہ محسن نقوی نے گلگت بلتستان کے عظیم سپوت حوالدار لالک جان( نشان حیدر)کے یوم شہادت پر انہیں سلام عقیدت پیش کرتے ہوئے کہا ہے کہ نشانِ حیدر کا یہ عظیم وارث پاکستان کے عسکری وقار، قومی خود مختاری اور استحکام کی تابندہ علامت ہے۔ پیر کو جاری بیان میں وزیر داخلہ نے کہا کہ حوالدار لالک جان شہید نے بے مثال جرات سے دفاع وطن کا روشن باب رقم کیا،ان کی داستان شجاعت رہتی دنیا تک قوم کا فخر اور تاریخ کا اثاثہ رہے گی۔

وزیر داخلہ نے کہا کہ دشمن کے سامنے سینہ سپر رہنے والا یہ سپاہی مادرِ وطن کی سرحدوں کا ناقابل فراموش نگہبان بن کر ہمیشہ کے لیے امر ہو گیا، اگلے مورچوں پر جا کر دشمن کے سامنے ڈٹ جانے والے اس جوان نے بہادری اور حب الوطنی کی اعلیٰ ترین مثال قائم کی۔

(جاری ہے)

محسن نقوی نے کہا کہ دشمن کی شدید گولہ باری میں زخمی ہونے کے باوجود مورچہ نہ چھوڑنے والے اس بلند حوصلہ سپاہی نے ثابت قدمی کی ایسی مثال قائم کی جو تاریخ کے سینے پر ہمیشہ نقش رہے گی،دشمن کی یلغار کا مردانہ وار مقابلہ کرنے والا لالک جان آج بھی قوم کے دلوں میں زندہ ہے۔

وزیر داخلہ نے کہا کہ جنگی تاریخ میں وہ سپاہی نایاب ہوتے ہیں جن کے قدموں سے وفا، جرات اور قربانی کی خوشبو پھوٹتی ہواور لالک جان انہی لازوال سپاہیوں میں سے ایک تھے۔ انہوں نے کہا کہ لالک جان کی بے مثال دلیری نے ثابت کیا کہ قومیں شہیدوں کے جذبے سے جنگیں جیتتی ہیں،نشانِ حیدر کا یہ عظیم وارث پاکستان کے عسکری وقار، قومی خودمختاری اور استحکام کی تابندہ علامت ہے۔محسن نقوی نے کہا کہ لالک جان شہید قوم کا ہیرو ہے اور ہمیشہ ہمارے دلوں میں زندہ رہے گا، قوم کا سلام ہے اس جوانمرد کو جس نے شجاعت کی آخری حد چھو کر جام شہادت نوش کیا۔\932